ارال تەڭىزىن ساقتاۋ جوباسىنىڭ 2-كەزەڭى جۇزەگە اسىرىلادى

استانا. قازاقپارات - كەلەسى جىلى سولتۇستىك ارال تەڭىزىن ساقتاۋ جانە سىرداريا ارناسىن رەتتەۋ جوباسىنىڭ 2- كەزەڭى باستالادى، دەپ حابارلايدى 24KZ.

قازىرگى ۋاقىتتا دۇنيەجۇزىلىك بانكتىڭ 1,5 ميلليون دوللارلىق گرانتى ەسەبىنەن قاجەتتى قۇجاتتاما ازىرلەنىپ جاتىر. ارالدى قۇتقارۋ حالىقارالىق قورىنىڭ ءبىرىنشى وتىرىسىندا ەكولوگيالىق جانە الەۋمەتتىك ماڭىزى جوعارى جوبانىڭ نەگىزگى باعىتتارى تالقىلاندى. جيىنعا قاتىسقان قازاقستان، وزبەكستان، قىرعىزستان، تاجىكستان جانە تۇرىكمەنستان ەلدەرىنىڭ ۇكىمەت مۇشەلەرى مەن گيدروماماندارى سۋ بولىنىستەرىنە قاتىستى ۇستانىمدارىن ورتاعا سالدى.

وسىدان 2 جىل بۇرىن ارال تەڭىزىندەگى سۋ كولەمى 18 ميلليارد تەكشە مەتر بولسا، قازىرگى تاڭدا 22 ميللياردقا جەتتى. تاراپتار سىرداريا وزەنى بويىنداعى ينفراقۇرىلىمدى دامىتا وتىرىپ، سۋ رەسۋرستارىن باسقارۋدىڭ اقپاراتتىق بازاسى مەن جۇيەلەرىن جاڭارتۋ جونىندە كەلىسىمگە كەلدى.

نۇرجان نۇرجىگىتوۆ، ق ر سۋ جانە يرريگاتسيا ءمينيسترى:

- نەگىزگى 2 ۇلكەن باعدارلاما قابىلدانعان. 1-سىرداريا وزەنى بويىندا ورنالاسقان مەملەكەتتەردىڭ الەۋمەتتىك-ەكونوميكالىق دامۋى. ەكولوگيالىق ماسەلەلەر دە بار. سۋدىڭ ساپاسىن كوتەرۋ ماسەلەسى بار. حالىقارالىق دونورلارمەن تاعى دا قارجىلاندىرۋ ماسەلەسى بويىنشا كەزدەسۋ وتەدى. 3-قوردىڭ ۇيىمداستىرۋ سترۋكتۋراسىنىڭ وزگەرۋىنە بايلانىستى قاتىسۋشىلاردىڭ تاراپىنان بىرنەشە ۇسىنىس بەرىپ جاتىر. ءبىز ءبىر كەلىسىمگە كەلۋىمىز كەرەك.