ارال تۇرعىنى ءۇيىنىڭ الدىنداعى ەسكى سارايدى مۋزەيگە اينالدىرعان
قىزىلوردا. KAZINFORM - قىزىلوردا وبلىسىنىڭ ارال اۋدانىندا ءۇيىنىڭ الدىنداعى ەكى بولمەلى ەسكى سارايدى مۋزەيگە اينالدىرعان ازامات تۇرادى.
كەيىپكەرىمىز نۇرجان ىزدىبايەۆ مەملەكەتتىك قىزمەت سالاسىندا جۇمىس ىستەيدى. ەسكى دۇنيەگە اۋەستىگى ەكى جىل بۇرىن اتاسى مەن اجەسى تۇتىنعان زاتتاردى جيناۋدان باستالعان.
بۇگىندە مۋزەي (بۇل جەردە ءبىز «مۋزەي» دەپ شارتتى تۇردە اتاپ وتىرمىز) قورىنداعى جادىگەرلەر سانى مىڭعا جەتتى. كوبىنە تۋعان- تۋىس، دوس-جاران، ارىپتەستەرى قولعا تۇسكەنىن بەرەدى ەكەن. ال ەندى ءبىر بولىگىن الەۋمەتتىك جەلىدەگى وقىرماندارى سىيعا تارتقان.
- TikTok پاراقشامدا 24 مىڭداي جازىلۋشى بار. تىكەلەي ەفيردە حوببيىم تۋرالى ايتىپ، كوپشىلىككە قورداعى دۇنيەلەردى كورسەتەمىن، تانىستىرامىن. پلاستينكا، كاسسەتاعا جازىلعان رەترو اندەردى تىڭداتىپ، كاسسەتا، DVD ديسكىگە جازىلعان ۆيدەولاردان ءۇزىندى سالىپ وتىرامىن. سوعان قىزىعۋشىلىق ءبىلدىرىپ، تانىماسا دا قولىندا بار ەسكى دۇنيەلەردى سىيلىققا بەرىپ جىبەرگەندەر از ەمەس، - دەدى نۇرجان ىزدىبايەۆ.
مۋزەي جادىگەرلەرىنىڭ ىشىندەگى ەڭ كونەسى - رەسەي يمپەرياسى كەزىندە قولدانىلعان 1725 -جىلى شىققان تيىن. ودان بولەك 1973 -جىلى شىققان شاڭسورعىش، 1978 -جىلى شىققان تەلەديدار، شاحتەرلار قولدانعان 1950 -جىلعى تەلەفون بار.
- تەلەديداردى ۇيدەگىلەر اتام بار كەزدە پايدالانعان ەكەن. ال تەمىر تەلەفوندى شاحتادا توتەنشە جاعداي كەزىندە دابىل قاعۋ، حابار بەرۋ ماقساتىندا قولدانعان. ونى ءوزىم سياقتى كوللەكتسيونەردەن 30 مىڭ تەڭگەگە ساتىپ الدىم. ەڭ قىمباتقا ساتىپ العانىم - ازىرگە وسى، - دەدى مۋزەي يەسى.
مۇندا مايشام، ماگنيتوفون، ۇتىك، ءۇي تەلەفونى، ۇيالى تەلەفون، كارتينكا، تاعى باسقا زاتتاردىڭ ءتۇر-ءتۇرى بار.
اجەسىنىڭ ارتىنان كەلگەن ساندىقتى، ول كىسى تۇتىنعان كەبەجە، اسادال، ديىرمەندى دە نەمەرەسى كوزىنىڭ قاراشىعىنداي ساقتاپ كەلەدى.
كەيىپكەرىمىز بۇرناعى جىلعى ەڭبەك دەمالىسىن جيناعان دۇنيەلەرىنىڭ شاڭىن سۇرتۋگە، ولاردى ورىن- ورنىنا قويۋعا ارناعان. مۇنىڭ ءوزى - كوپ ۋاقىتتى قاجەت ەتەتىن جۇمىس.
- ءالى ءار زاتتىڭ تۇسىنا تاريحى، شىققان جىلى، قايدان، كىمنەن العانىم تۋرالى قىسقاشا مالىمەت جازىپ قويۋىم كەرەك. وعان كوبىنە مۇمكىندىك بولا بەرمەيدى. قىزىعۋشىلىقپەن باستاعان ىسىمە اكە-شەشەمنەن باستاپ ارىپتەستەرىمە دەيىن تۇسىنىستىكپەن قارايدى، قولدايدى. قولعا تۇسكەن قۇندى دۇنيەلەردى اكەپ بەرىپ، قورعا ۇلەس قوسادى، - دەدى كوللەكتسيونەر.
جەرگىلىكتى مۋزەيدەن حابارلاسىپ، جادىگەردەن ۇلەس سۇراعاندار بولىپتى. «وزىمنەن ارتىلسا، بەرۋگە دايىنمىن» ، - دەيدى نۇرجان ىزدىبايەۆ.
اۆتور
نازەركە سانيازوۆا