ارال اۋماعىندا سەكسەۋىل ەگۋ جوسپارى قالاي ورىندالدى
استانا. KAZINFORM – ق ر ەكولوگيا جانە تابيعي رەسۋرستار مينيسترلىگى ارال اۋماعىندا ەكولوگيالىق احۋالدى جاقسارتۋ ءۇشىن 2025 -جىلعا دەيىن 1,1 ميلليون گەكتار جەرگە سەكسەۋىل ەگۋ جوسپارىنا قاتىستى تۇسىنىك بەردى.
«2021 -جىلى مەملەكەت باسشىسى ەكولوگيالىق جاعدايدى جاقسارتۋ ماقساتىندا 2025 -جىلعا دەيىن ارال تەڭىزىنىڭ قۇرعاعان تۇبىندە سەكسەۋىل ەكپەلەرىن وتىرعىزۋ جولىمەن جالپى اۋدانى 1,1 ميلليون گ ا ورمان مەليوراتسيالىق جۇمىستاردى جۇرگىزۋ مىندەتىن قويدى. 2021-2024 -جىلدارى ارال تەڭىزىنىڭ قۇرعاعان تۇبىندە 413 مىڭ گەكتار اۋماقتا ورمان مەليوراتسيالىق جۇمىستار اتقارىلدى (سەكسەۋىل مەن گالوفيت وسىمدىكتەرىنىڭ 2083,4 توننا تۇقىمى سەبىلدى، 45,2 ميلليون سەكسەۋىل كوشەتى وتىرعىزىلدى). سونىمەن قاتار 197 مىڭ گەكتار اۋماققا ورماننىڭ تابيعي وسۋىنە ىقپال جاساۋ جۇمىستارى ىسكە اسىرىلدى»، - دەلىنگەن ەكولوگيا مينيسترلىگىنىڭ Kazinform اگەنتتىگىنە بەرگەن جاۋابىندا.
ۆەدومستۆو اقپاراتىنا قاراعاندا، 2024 -جىلى جوسپارلانعان 275 مىڭ گەكتار اۋماقتىڭ 65 مىڭ گەكتارىنا اعاش وتىرعىزۋ جۇمىستارى كوكتەمگى مەزگىلدە ورىندالدى. قالعان اۋماققا ورمان وتىرعىزۋ جۇمىستارى وسى جىلى كۇزدە اتقارىلىپ جاتىر.
«اتاپ ايتقاندا، 2025 -جىلعى جوسپار بويىنشا 280 مىڭ گەكتار قامتىلادى»، - دەپ اتالىپ وتكەن مينيسترلىك حابارلاماسىندا.
ايتا كەتەيىك، ق م گ قۇرعاعان ارال تۇبىندە 15 مىڭ گەكتار القاپقا 4 ميلليوننان استام سەكسەۋىل كوشەتىن وتىرعىزۋ بويىنشا مىندەتتەمە الدى.
بيىل شىلدە ايىندا پرەزيدەنت قاسىم-جومارت توقايەۆ تۇركى مەملەكەتتەرى ۇيىمىنىڭ بەيرەسمي سامميتىندە كاسپي جانە ارال تەڭىزدەرىندەگى ەكولوگيالىق ماسەلەلەردى شەشۋ ءۇشىن بىرلەسكەن كۇش-جىگەر قاجەت ەكەنىنە نازار اۋداردى.
اۆتور
رۋسلان عابباسوۆ