ەمدەۋ مەكەمەسىنىڭ مالىمەتىنشە، ول قوزعالتقىشى قوسۋلى تۇرعان كولىكتىڭ ىشىندە، جابىق گاراجدا شامامەن 20 مينۋت وتىرعان. كەيىن گازدىڭ ءيىسىن سەزىپ، كولىكتىڭ قوزعالتقىشىن وشىرگەنىمەن، گاراجدان شىقپاي، سالوندا ۇيىقتاپ قالعان.
ويانعاننان كەيىن ايەل ءوزىن جايسىز سەزىنگەن. الايدا دارىگەرگە تەك كەلەسى كۇنى السىزدىك، جۇرەك اينۋ، قۇسۋ، باس اينالۋ جانە باس اۋرۋى باسىلماعان سوڭ عانا كورىنگەن.
تەكسەرۋ بارىسىندا ونىڭ قانىنداعى كاربوكسيگەموگلوبين دەڭگەيى 13 پايىز بولعان. بۇل - ايەلدىڭ كومىرتەك توتىعىمەن ۋلانعانىن كورسەتەدى. ناۋقاس اۋرۋحانانىڭ تەراپيا بولىمىنە جاتقىزىلدى.
قازىر جاعدايى جاقسارعانىمەن، ەمدەۋ ءالى جالعاسىپ جاتىر.
- ۋلى گاز ءتۇسسىز ءارى ءيىسسىز. سوندىقتان ادام ونىڭ اۋادا بار ەكەنىن بايقاماي، ۋلانعانىن تىم كەش ءتۇسىنۋى مۇمكىن. ول وتتەگىنىڭ اعزاعا جەتكىزىلۋىنە كەدەرگى كەلتىرەدى. سونىڭ سالدارىنان مي، جۇرەك جانە باسقا دا ماڭىزدى اعزالار وتتەگى تاپشىلىعىنا ۇشىرايدى، - دەيدى دارىگەرلەر.
ءيىس ءتيىپ، ۋلانىپ قالۋدىڭ الدىن الۋ ءۇشىن، كولىكتىڭ قوزعالتقىشىن جابىق گاراجدا قوسپاعان ءجون. ماماندار، ءتىپتى، قوزعالتقىشتى گاراجدىڭ ەسىگىن اشىپ قويىپ تا قىزدىرۋدىڭ دەنساۋلىققا قاۋىپتى ەكەنىن ەسكەرتەدى. سونداي-اق، كولىكتىڭ جىلىتۋ قۇرىلعىلارىنىڭ جارامدىلىعىن تەكسەرىپ، جەلدەتۋ جۇيەسىنىڭ دۇرىس جۇمىس ىستەۋىن قاداعالاپ وتىرۋ ماڭىزدى.
ال ۋلانۋ بەلگىلەرى بولعان جاعدايدا، دەرەۋ تازا اۋاعا شىعىپ، 103 نەمەسە 112 نومىرىنە حابارلاسۋ كەرەك.
بۇعان دەيىن اۆتوكولىككە ارنالعان اينەك جۋعىش سۇيىقتىقتى تاڭداعان كەزدە ونىڭ قاۋىپسىزدىگىنە كوز جەتكىزۋدىڭ ماڭىزىن جازعان ەدىك.