اراب ۇيلەستىرۋ توبى ءوزىن قازاقستاننىڭ ستراتەگيالىق سەرىكتەسى رەتىندە كورسەتتى - پرەزيدەنت
استانا. KAZINFORM - پرەزيدەنت قاسىم-جومارت توقايەۆ ساۋد دامۋ قورىنىڭ باس ديرەكتورى سۇلتان ابدۋلراحمان ءال- مارشادپەن، ابۋ دابي دامۋ قورىنىڭ وپەراتسيالار جونىندەگى ديرەكتورى ادەل ابدۋللا حالاف شامس ءال- حوسانيمەن، اراب ەكونوميكالىق دامۋى كۋۆەيت قورى باس ديرەكتورى ورىنباسارىنىڭ مىندەتىن اتقارۋشى راشايد ءال- بادەرمەن جانە قاتار دامۋ قورىنىڭ ستراتەگيالىق ينۆەستيتسيا ماسەلەلەرى جونىندەگى باسقارۋشىسى حايا بينت ابدۋلراحمان ءال تانيمەن كەزدەسۋ وتكىزدى.
مەملەكەت باسشىسى قازاقستان مەن شىعاناق ەلدەرى اراسىندا ساياسي، ساۋدا- ەكونوميكا سالالارى بويىنشا ءوزارا ءتيىمدى جانە بەرىك قارىم- قاتىناس ورناعانىن اتاپ ءوتتى.
سونىمەن قاتار اراب ەلدەرىمەن جان-جاقتى بايلانىس ناقتى كەلىسىمشارتتارمەن جانە كەلىسىمدەرمەن بەكىتىلگەن. وعان ءوزارا ساپارلار جانە جوعارى دەڭگەيدەگى كەلىسسوز بارىسىندا قول جەتكىزىلگەن بولاتىن.
پرەزيدەنتتىڭ ايتۋىنشا، اراب ۇيلەستىرۋ توبى ءوزىن قازاقستاننىڭ ستراتەگيالىق سەرىكتەسى رەتىندە كورسەتتى.
بۇل رەتتە قاسىم-جومارت توقايەۆ ەلىمىزدە 2029 -جىلعا قاراي كەمىندە 150 ميلليارد دوللار كولەمىندە تىكەلەي شەتەلدىك ينۆەستيتسيا تارتۋدى ماقسات ەتەتىن جاڭا ينۆەستيتسيالىق كەزەڭ باستالعانىن ايتتى.
اراب ۇيلەستىرۋ توبى قورلارىنىڭ باسشىلارى قازاقستان ۇكىمەتى مۇشەلەرىمەن جانە بيزنەس قاۋىمداستىعىنىڭ وكىلدەرىمەن ەكىجاقتى ءارى كوپجاقتى كەلىسسوزدىڭ تابىستى وتكەنىن جەتكىزدى.
وندا ەكونوميكانىڭ باسىم باعىتتارىندا بىرلەسكەن ينفراقۇرىلىمدىق جانە يندۋستريالدىق جوبالاردى قارجىلاندىرۋ مەن دامىتۋ ماسەلەلەرى قاراستىرىلعان.