اۋەجاي دا ۇشاقتارعا قىزمەت كورسەتۋدى ۋاقىتشا كەيىنگە قالدىردى، دەپ حابارلايدى انادولى.
باحرەيننىڭ Gulf Air اۋە كومپانياسى 12-17 قازان ارالىعىندا باحرەين مەن ەر-رياد اراسىنداعى ەكى باعىتتاعى بارلىق رەيستى توقتاتتى.
Qatar Airways سوڭعى وقيعالارعا بايلانىستى ەر-رياد پەن داممام قالالارىنا قاتىنايتىن رەيستەر ۋاقىتشا توقتاتىلعانىن حابارلادى.
بىرىككەن اراب امىرلىكتەرىنىڭ ۇلتتىق اۋە تاسىمالداۋشىسى Etihad Airways ابۋ-دابي مەن ەر-رياد اراسىنداعى بارلىق رەيستى 19-قازان، دۇيسەنبىگە دەيىن توقتاتتى. بۇدان بولەك، كومپانيا سەيسەنبى جانە سارسەنبى كۇندەرىنە جوسپارلانعان ابۋ- دابي - داممام رەيستەرىن، سونداي-اق بەيسەنبىگە دەيىن ابۋ-دابيدەن جيدداعا قاتىنايتىن كەيبىر رەيستەردى توقتاتتى.
كۋۆەيتتىڭ Kuwait Airways اۋە كومپانياسى كورول حاليد اتىنداعى حالىقارالىق اۋەجايدىڭ ۋاقىتشا جابىلۋىنا بايلانىستى ەر-ريادقا قاتىنايتىن رەيستەردىڭ توقتاتىلعانىن مالىمدەدى.
مىسىردىڭ EgyptAir اۋە كومپانياسى اۋەجاي جۇمىسى قايتا جاندانعانعا دەيىن كاير مەن الەكساندريادان ەر-ريادقا ۇشاتىن رەيستەر توقتاتىلعانىن حابارلادى.
ساۋد ارابياسىنىڭ ازاماتتىق اۆياتسيا باس باسقارماسى كورول حاليد اتىنداعى حالىقارالىق اۋەجايدىڭ جۇمىسى قوسىمشا حابارلاماعا دەيىن توقتاتىلاتىنىن مالىمدەدى. ۆەدومستۆونىڭ تۇسىندىرۋىنشە، مۇنداي شەشىم اۋەجاي ينفراقۇرىلىمىنىڭ قاۋىپسىزدىگىن تەكسەرۋ جانە ونىڭ جۇمىسىن قايتا باستاۋعا دايىندىعىن باعالاۋ ءۇشىن قابىلدانعان. تەكسەرۋ جۇمىستارى ءتيىستى مەملەكەتتىك ورگاندارمەن بىرلەسىپ جۇرگىزىلىپ جاتىر.
اۋە قاتىناسىنداعى ۇزىلىستەرگە بايلانىستى ساۋد ارابياسىنىڭ كاتار، باحرەين، ومان، بىرىككەن اراب امىرلىكتەرى جانە كۋۆەيتتەگى ەلشىلىكتەرى رەيستەردىڭ توقتاتىلۋىنا بايلانىستى ەلىنە قايتا الماي جۇرگەن ازاماتتارىن ەر-ريادقا جەتكىزۋ ءۇشىن اۆتوبۋس قاتىناسىن ۇيىمداستىردى.
ەسكە سالايىق، سوڭعى ءبىر اپتادا ساۋد ارابياسىنداعى 5 اۋەجايعا ون رەت شابۋىل جاسالعان. سالدارىنان 20 ادام قازا تاۋىپ، جۇزدەگەن ادام جارالاندى.
ايتا كەتەيىك، حۋسيتتەر ساۋد ارابياسىنىڭ اۋەجايلارىنا تاعى دا شابۋىلدار جاسايتىنىن ەسكەرتتى.
بۇعان دەيىن سىرتقى ىستەر مينيسترلىگى ساۋد ارابياسىنىڭ ازاماتتىق ينفراقۇرىلىمىنا جاسالعان شابۋىلدارعا بايلانىستى اتالعان ەلدەگى قازاقستان ازاماتتارىن قاۋىپسىزدىك شارالارىن ساقتاۋعا شاقىرعان بولاتىن.