«ار ادامى. باۋىرجان» دەرەكتى دراماسىنىڭ پرەمەراسى ءوتىپ جاتىر

استانا. KAZINFORM - استانادا «ار ادامى. باۋىرجان» دەرەكتى دراماسىنىڭ پرەمەراسى ءوتىپ جاتىر. جەڭىستىڭ 80 جىلدىعىنا وراي قويىلىپ جاتقان سپەكتاكل ءازىربايجان مامبەتوۆ اتىنداعى مەملەكەتتىك دراما جانە كومەديا تەاترىندا ساحنالاندى.

- بۇل قويىلىم دەرەكتى دراما. سەبەبى باۋىرجان مومىش ۇلى اتامىز ومىردە بولعان جانە ول كىسىنىڭ ەرلىكتەرى ەلدىڭ اۋزىندا كوپ ايتىلادى. بۇل قويىلىمدا باۋىرجان مومىش ۇلىن قارت باۋىرجان جانە جاس باۋىرجان رەتىندە كورسەتەمىز. سپەكتاكل 9-10-مامىر كۇندەرى ساعات 18:00 دە سوعىستا قۇربان بولعانداردى 1 مينۋت ەسكە الۋمەن باستالدى، - دەيدى «ار ادامى. باۋىرجان» دەرەكتى دراماسىنىڭ رەجيسسەرى.

سپەكتاكلدە الەكساندر بەكتىڭ «ۆولوكولامسك تاس جولى» رومانىنداعى وقيعالار مەن ۇزىندىلەر بەينەلەنەدى.

- اكتەرلەرگە قويىلعان ەڭ باستى تالاپ - باۋىرجان اتامىزدىڭ سويلەۋ مانەرىن، داۋىس ىرعاعىن، وبرازىن شىنايى كورسەتە الۋ. سوزبەن-اق ول كىسىنىڭ مىنەزىن، مىسىن بايقاتۋ. وسى سپەكتاكلدە باۋىرجاننىڭ سوعىستاعى پسيحولوگياسىن، سولداتتارى قيىن جاعدايعا تۇسكەندەگى ونىڭ ءىس-ارەكەتىن، شەشىمدەرىن كورەرمەنگە جەتكىزەمىز، - دەيدى جۇلدىزبەك جۇمانباي.

رەجيسسەر قويىلىمدى نە سەبەپتى «ار ادامى. باۋىرجان» دەپ اتاعانىن ءتۇسىندىردى.

- «ار ادامى» دەپ اتاعان سەبەبىمىز - ول كىسىنىڭ وتىرىككە جانىنىڭ قاستىعى. سوعىستا ەڭبەك دەمالىسى بولىپ، باۋىرجان اتامىز ەلگە قايتادى. سول كەزدە اتاقتى جازۋشى، عالىمدارمەن كەزدەسىپ، لەكتسيا وقيدى. سونداعى قۇجاتتارىن وقىپ وتىرىپ، اۋەزوۆكە، مۇسىرەپوۆتەرگە ەسكەرتۋ ايتاتىن، قالاي جازۋ كەرەكتىگى تۋرالى ءوز ويىن بىلدىرەتىن قانداي كۇش، قانداي مىنەز دەپ تاڭعالدىم، - دەيدى ول.

سپەكتاكلدى ساحنالاۋعا تەاتردىڭ بارلىق اكتەرلىك قۇرامى جۇمىلدىرىلىپتى.

- جالپى تەاتردا 40 اكتەر بار. سولاردىڭ ءبارى وسى قويىلىمعا قاتىسادى. ويتكەنى بۇل - سوعىس. سوعىس ءبىر ادامعا عانا كەلگەن جوق، بۇكىل ۇلتقا كەلدى. سوندىقتان بۇل جەردە بارلىق ەر ادامدار سوعىسىپ جاتسا، ايەل ادامداردىڭ دا تىرشىلىگى، ولاردىڭ قيىندىعى قاتار كورسەتىلەدى. قويىلىمنىڭ دايىندىق جۇمىستارىنا 1 اي، ال جازىپ شىعارۋعا 6- 7 اي كەتتى، - دەيدى رەجيسسەر.

ال باۋىرجاننىڭ جاس كەزىن وينايتىن اكتەر ءوزى ءرولىن سومدايتىن كەيىپكەردىڭ مىنەزىنە تاڭعالاتىنىن جەتكىزدى.

- مەنىڭ تاڭعالاتىنىم - باۋىرجان اتامىزدىڭ مىنەزى. وتە مىنەزدى، بىربەتكەي كىسى بولعان. ونى ءبىز قاي جەردەن كورە الامىز؟ سوعىستا ءوزىنىڭ باتالونىنداعى جاۋىنگەرى مايداننان كەتۋ ءۇشىن ءوز قولىن ءوزى اتادى. سولاي قاشىپ كەتەمىن دەپ ويلايدى. ال باۋىرجان اتامىز ول كىسىنى بارلىق باتالوننىڭ الدىندا ءوزىنىڭ بولىمشەسىنە اتقىزادى. ول - قازاق جاۋىنگەرى ەدى. بىلاي قاراساڭىز، وتە قيىن نارسە عوي. ءبىراق اتپاسقا بولمادى. وزگەلەرگە ساباق بولسىن دەدى، - دەيدى ءامىرحان ورازباق.

ءامىرحان وسى رولىنەن كەيىن ءوزىنىڭ دە مىنەزى وزگەرە باستاعانىن بايقاعان.

- قازىر ءوزىم دە بايقاپ ءجۇرمىن. دايىندىقتان شىققاننان كەيىن ادامنىڭ كوزىنە تىك قاراۋدى شىعاردىم. ول كىسى تومەن قاراپ سويلەمەگەن عوي. تىك تۇرىپ سويلەگەن. ءوز مىنەزىمنەن وزگەرىستەردى بايقاپ ءجۇرمىن. بۇعان دەيىن مەن مۇلدە باسقا ادام ەدىم، - دەيدى اكتەر.

«ەر ادام - دانەك بولسا، ايەل - گۇل. جاپىراقسىز گۇلدەر ورىسشا «سۋشنياك». ال بىزدىڭشە «قۋباس» دەپ اتالادى. ايەلدەر - ادامزات ءونىمى ءوسىپ-ونەتىن اسىل توپىراق. بىزدەر - ءونىمبىز. جامان ءونىم ەمەس سياقتىمىز. ءبارىمىز جاقسىمىز. ايەلدەرسىز ادامزات ءونىمى بولمايدى. ايەل - بىزگە انا، جار، قالىڭدىق، سۇيىكتى بالالارىمىزدىڭ اناسى. ال ۇرىستا - قارۋلاس قۇربى».

بۇل - بۇگىنگى قويىلىمدا جاس باۋىرجاننىڭ ايتاتىن سوزدەرى. رەجيسسەر وسىلاي باستى كەيىپكەردىڭ مىنەزىن عانا ەمەس، الەمگە دەگەن جان-جاقتى كوزقاراسىن دا اشىپ كورسەتۋگە تىرىستىق دەيدى.

- باۋىرجاننىڭ تەك بىربەتكەيلىگىن عانا ەمەس، وزدەرىڭىز كورىپ وتىرعانداي، ونىڭ ايەلگە، وتباسىعا، وتانعا، سولداتقا دەگەن كوزقاراسىن بەينەلەگىمىز كەلەدى. بۇل جەردە باۋىرجان اتامىزدىڭ كەلىنى زەينەپ اپامىزدىڭ دا ديالوگتارى بار. وزبەك سولداتىمەن كەزدەسەتىن وقيعالارى بار. جالپى دەرەكتى دراما دەگەننەن كەيىن، اسكەري تاقىرىپ بولعاننان كەيىن، ءبىزدىڭ ماقساتىمىز - مىندەتتى تۇردە ناقتى دەرەكتى كورسەتۋ بولدى، - دەيدى جۇلدىزبەك جۇمانباي.

ايتا كەتەيىك، الماتىدا جەڭىستىڭ 80 جىلدىعى قارساڭىندا «ەۆاكۋاتسيا» انتيسوعىستىق دراماسىنىڭ جابىق كورسەتىلىمى ءوتتى.