اۋقىمدى وزگەرىستەر: ءماجىلىس ادىلەتتى قازاقستان قۇرۋ قاعيداتتارىنا سۇيەنگەن رەزوليۋتسيانى قابىلدادى

استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا ەلىمىزدىڭ بارلىق پروگرەسسيۆتى قوعامدىق-ساياسي كۇشتەرىن مەملەكەت باسشىسىنىڭ توڭىرەگىندە توپتاسۋعا جانە ادىلەتتى قازاقستان قۇرۋ قاعيداتتارىنا نەگىزدەلگەن رەزوليۋتسيا (قارار) قابىلداندى.

ايتا كەتەيىك، پالاتا وتىرىسىندا ءماجىلىس ءتوراعاسى ەرلان قوشانوۆ «پرەزيدەنت قاسىم-جومارت توقايەۆتىڭ ساياسي رەفورمالارىن ىسكە اسىرۋ - مەملەكەتتىك قۇرىلىستىڭ جاڭا تاريحي كەزەڭى» اتتى بايانداما جاسادى.

بۇل رەتتە ول ەلىمىزدىڭ بارلىق پروگرەسسيۆتى قوعامدىق-ساياسي كۇشتەرىن مەملەكەت باسشىسىنىڭ توڭىرەگىندە توپتاسۋعا جانە ادىلەتتى قازاقستان قۇرۋ قاعيداتتارىنا نەگىزدەلگەن رەزوليۋتسيا قابىلداۋدى ۇسىنعان ەدى.

- مەن جاڭا عانا ءوز سوزىمدە ەلىمىزدىڭ بارلىق پروگرەسسيۆتى قوعامدىق-ساياسي كۇشتەرىن مەملەكەت باسشىسىنىڭ توڭىرەگىندە توپتاسۋعا جانە ادىلەتتى قازاقستان قۇرۋ قاعيداتتارىنا نەگىزدەلگەن رەزوليۋتسيا قابىلداۋدى ۇسىندىم. بۇل - پارلامەنت ءماجىلىسىنىڭ رەزوليۋتسياسى... بۇگىن مازمۇندى ءارى ساليقالى جيىن بولدى. تالقىلاۋ بارىسىندا ەلدەگى اۋقىمدى وزگەرىستەردىڭ بارلىق تۇسى قامتىلدى دەپ ويلايمىن. ءسوز سويلەگەن ءار ازامات ءوزىنىڭ قۇندى ۇسىنىستارىن جاريالادى. سولاردىڭ بارلىعى مۇقيات زەردەلەنەدى. مەملەكەت باسشىسى ايقىنداپ بەرگەن جولدان جاڭىلماۋىمىز قاجەت. پرەزيدەنت رەفورمالارىن ىسكە اسىرۋ الداعى ۋاقىتتا دا بارشامىزدىڭ باستى مىندەتىمىز بولىپ قالا بەرەدى، - دەدى ەرلان قوشانوۆ.

جالپى وتىرىس بارىسىندا پالاتا دەپۋتاتتارى اتالعان ۇسىنىسقا قولداۋ ءبىلدىردى.

بۇدان بۇرىن حابارلانعانداي، بەلگىلى ەكونوميست جاقسىبەك كۇلەكەيەۆ ەلىمىزدەگى وزگەرىستەر اياسىندا ورتا بيزنەستىڭ دامۋىنا جاعداي جاسالىپ جاتقانىن ايتتى.

ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلدايەۆ ەلىمىزدەگى عىلىم سالاسىن دامىتۋعا قاتىستى ۇسىنىسىن جاريالادى.

اۆتور

رۋسلان عابباسوۆ