«اقىلى جولمەن ءجۇردىڭىز»: ش ق و- دا بۇقتىرماعا سالىنعان كوپىردەن الاياقتار پايدا تاۋىپ جاتىر

وسكەمەن. KAZINFORM - پرەزيدەنت تاپسىرماسىمەن شىعىس قازاقستان وبلىسىنداعى بۇقتىرما سۋ قويماسىنا سالىنعان كوپىردى الاياقتار ءوز پايدالارىنا قولدانا باستادى.

سوڭعى كۇندەرى وبلىس تۇرعىندارىنىڭ تەلەفونىنا بۇقتىرما سۋ قويماسىنداعى كوپىرمەن ءجۇرىپ وتكەنى ءۇشىن اقى تولەۋى قاجەتتىگى جايلى حابارلامالار كەلە باستاعان. وندا سول تۋرالى تولىعىراق اقپارات الۋ ءۇشىن تومەندەگى سىلتەمەگە ءوتۋ قاجەتتىگى جازىلعان. 
راسىمەندە كوپىر اقىلى بولىپ كەتتى مە، الدە بۇل الاياقتاردىڭ كەزەكتى امالى ما؟ Kazinform ءتىلشىسىنىڭ بۇل ساۋالىنا ش ق و جولاۋشىلار كولىگى جانە اۆتوموبيل جولدارى باسقارماسىنىڭ باسشىسى نۇرلان ءجۇمادىلوۆ جاۋاپ بەردى.
«كوپىرمەن ءجۇرۋ كولىكتىڭ بارلىق ءتۇرى ءۇشىن تەگىن. مۇنداي حابارلامالاردى الاياقتار جىبەرىپ جاتىر. ازاماتتاردى ءمان بەرمەۋگە جانە كۇدىكتى سىلتەمەلەرگە وتپەۋگە شاقىرامىز»، - دەدى ول.
ەسكە سالساق، وسىعان دەيىن ش ق و- دا ينتەرنەتتەگى الاياقتاردىڭ ارباۋىنا 700 دەن استام ادام ىلىككەنى حابارلانعان.