اقوردادا تاسقىنمەن كۇرەسكە بەلسەنە اتسالىسقان ازاماتتاردى ماراپاتتاۋ ءراسىمى ءوتتى
استانا. KAZINFORM - مەملەكەت باسشىسى سۋ تاسقىنىمەن كۇرەس شارالارىنا بەلسەنە اتسالىسقان ەل ازاماتتارىن ماراپاتتاۋ راسىمىندە ءسوز سويلەدى.
پرەزيدەنت، ەڭ الدىمەن، بۇل بۇرىن ەشقاشان بولماعان ەڭ جويقىن تابيعي اپات ەكەنىن اتاپ ءوتتى. قازاقستاننىڭ 10 ايماعىندا توتەنشە جاعداي جاريالاندى. جالپى، ەل كولەمىندە 19 مىڭنان استام تۇرعىن ءۇيدى سۋ باستى.
- سىن ساعاتتا ەلىمىز ىرىستى ىنتىماعىن تانىتتى. ءبىز تابيعي اپات كەزىندە جۇرت بولىپ جۇمىلدىق. ءبىرتۇتاس ەل ەكەنىمىزدى كورسەتتىك. قۇتقارۋشىلار، اسكەريلەر، ىشكى ىستەر ورگاندارى مەن اكىمدىك قىزمەتكەرلەرى تاۋلىك بويى جۇمىس ىستەدى. ولار وتان الدىنداعى پارىزىن ءمىنسىز اتقاردى. ءبىر سوزبەن، انتقا ادال بولدى، - دەدى مەملەكەت باسشىسى.
قاسىم-جومارت توقايەۆ توپان سۋمەن كۇرەسكە كۇشتىك قۇرىلىمداردىڭ 63 مىڭنان استام قىزمەتكەرى اتسالىسقانىنا نازار اۋداردى. قۇتقارۋ وپەراتسياسى بارىسىندا 120 مىڭنان استام ادام، ونىڭ ىشىندە 40 مىڭ بالا قاۋىپسىز جەرگە كوشىرىلدى.
- بۇل - قۇتقارۋشىلار مەن ۇشقىشتاردىڭ قاجىرلى ەڭبەگىنىڭ ناتيجەسى. ءابىش كەكىلبايەۆ «ەلىن سۇيگەن ازاماتقا ەڭ ۇلكەن قايعى - ءوز حالقىنىڭ تاعدىرىنان تىس قالۋ» دەپ ايتقان. ۇلتتىق ەرىكتىلەر جەلىسى تابيعي اپات بولعان ساتتەن باستاپ ەرەكشە بەلسەندى بولدى. 50 مىڭنان استام ۆولونتەر كومەك كەرۋەندەرىن ۇيىمداستىردى. ولار اپات ايماقتارىنا ازىق-تۇلىك جانە باسقا دا قاجەتتى زاتتاردى جەتكىزۋگە اتسالىستى. قازاقستان حالقى اسسامبلەياسىنىڭ «جۇرەكتەن جۇرەككە» اكسياسى ورتاق ىسكە مول سەپتىگىن تيگىزدى، - دەدى پرەزيدەنت.
مەملەكەت باسشىسى كەنتاۋ قالاسىندا تۇراتىن گاۋھار شايمەردەن ەسىمدى وقۋشى قىزدىڭ اتا-اناسىنا وتانشىل ۇرپاق ءوسىرىپ جاتقانى ءۇشىن العىس ايتتى. ول ءوزى جيناپ جۇرگەن قارجىسىن قۇلسارى قالاسىنىڭ تۇرعىندارىنا اۋدارعان. سونىمەن قاتار اتىراۋ وبلىسىنىڭ تۇرعىندارى - توقساننان اسقان ورىنشا توقتىباق قىزى مەن ءاليا دوسمۇحانوۆانىڭ ەرەن ەڭبەگىن ەرەكشە اتاپ ءوتتى. بۇدان بولەك، پرەزيدەنت كومەك بەرگەنى ءۇشىن باۋىرلاس مەملەكەتتەرگە، حالىقارالىق كومپانيالار مەن ۇيىمدارعا ريزاشىلىعىن ءبىلدىردى.
- ناعىز دوستىق قيىندىقتا سىنالادى دەپ تەكتەن- تەك ايتپايدى. كەيبىر شەتەلدىك ازاماتتار زارداپ شەككەن ادامدارعا جاردەمدەسۋ ءۇشىن ارنايى كەلدى. وسى ءساتتى پايدالانىپ، قيىن-قىستاۋ شاقتا قولداۋ بىلدىرگەنى ءۇشىن شەتەلدىك سەرىكتەستەرىمىزگە جانە دوستارىمىزعا شىن جۇرەكتەن ريزاشىلىعىمدى بىلدىرەمىن، - دەدى مەملەكەت باسشىسى.
پرەزيدەنتتىڭ ايتۋىنشا، سۋ تاسقىنى كەزىندە حالقىمىز بىرلىگى بەكەم، ىنتىماعى بەرىك ەل ەكەنىن كورسەتتى.
- الاپات سۋ تاسقىنداپ كەلىپ قالعاندا، وتانداستارىمىز تابيعات اپاتىمەن كۇرەسىپ جاتقان قۇتقارۋشىلارعا كومەك قولىن سوزدى. ولار سۋ باسقان ايماقتاردا جاۋاپتى قىزمەت مەكەمەلەرىنە جاردەمدەسىپ، جانقيارلىقپەن ارەكەت ەتتى ءارى باتىلدىق تانىتتى. كوبى ادامدار مەن جانۋارلاردى ءوز كولىكتەرىمەن قاۋىپسىز جەرگە الىپ شىقتى. مىڭداعان جاناشىر ازامات تاسقىن سۋدان قورعايتىن بوگەن سالۋعا قاتىستى. ورتاق كۇش-جىگەردىڭ ارقاسىندا ءبىز جاعدايدىڭ ۋشىعىپ كەتۋىنە جول بەرمەدىك، - دەدى قاسىم- جومارت توقايەۆ.
سونىمەن قاتار مەملەكەت باسشىسى وزدەرىن ناعىز وتانشىل ءارى جاۋاپتى ازامات رەتىندە كورسەتكەن ەرىكتىلەردىڭ ەڭبەگىن جوعارى باعالاپ، ولاردى قازىرگى زاماننىڭ باتىرلارى دەپ اتادى.
- مەن ەرىكتىلەر قوزعالىسىنىڭ دامۋىنا ايرىقشا ءمان بەرەمىن. وزدەرىڭىزگە ءمالىم، 2020 -جىلدى ۆولونتەر جىلى دەپ جاريالادىم. وسى ۋاقىت ىشىندە ەلىمىزدەگى ۆولونتەرلىك قىزمەت مۇلدە جاڭا دەڭگەيگە كوتەرىلدى. ەرىكتىلەردىڭ كۇش-جىگەرىنىڭ ارقاسىندا ماڭىزدى باستامالار مەن جوبالار جۇزەگە استى. ەڭ باستىسى، ءبىز ادامداردىڭ مەملەكەت پەن قوعام ومىرىنە ارالاسۋعا، ادامي قۇندىلىقتار مەن قاسيەتتەرگە ساي بولۋعا دەگەن نيەتىن وياتتىق. ەلىمىزدەگى جان-جاقتى جاڭعىرۋلاردىڭ قوزعاۋشى كۇشى - ادام. قولعا الىنعان اۋقىمدى رەفورمالار تابىستى جۇزەگە اسۋ ءۇشىن ەلىمىزدىڭ بارشا ازاماتى كۇش بىرىكتىرۋى قاجەت ەكەنىنە سەنىمدىمىن، - دەدى قاسىم-جومارت توقايەۆ.
پرەزيدەنت باسپاناسىز قالعان ادامدارعا «قازاقستان حالقىنا» قورىنان تۇرعىن ءۇي سالۋعا قاراجات بولىنگەنىن ايتتى. جالپى، 2200-دەن استام ءۇي سالىنادى. سونداي- اق 10 مىڭعا جۋىق باسپانا كۇردەلى جوندەۋدەن وتەدى.
- تاسقىننىڭ زاردابىن جويۋعا ءبىرقاتار كاسىپكەرىمىز قوماقتى قاراجات ءبولدى. ولار ءاردايىم تۋعان ەلىمەن بىرگە ەكەنىن ناقتى ىسپەن دالەلدەدى. ۇلت مۇددەسىنە ساي جاۋاپكەرشىلىگى مول كاسىپكەرلىك دەگەنىمىز - وسى. ارينە، قالىس قالعان كاسىپكەرلەر دە از ەمەس، ولاردىڭ كىم ەكەنىن دە جاقسى بىلەمىز. ءبىز ەشكىمدى ماجبۇرلەگەن جوقپىز. اركىم ءوز تاڭداۋىن جاسادى، - دەدى مەملەكەت باسشىسى.
قاسىم-جومارت توقايەۆ كيەۆتە قازاقستان جۋرناليسىنە جاسالعان قاستاندىق ارەكەتكە قاتىستى پىكىر ءبىلدىردى.
- ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ - باستى مىندەت. بۇل ماسەلە بويىنشا مەنىڭ كوزقاراسىم - ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كيەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا رەسمي سۇراتۋلار جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى، - دەدى پرەزيدەنت.
قاسىم-جومارت توقايەۆ ءسوزىن قورىتىندىلاي كەلە، اپات سالدارىن جويۋعا اتسالىسقان ءار ازاماتقا شىنايى ريزاشىلىعىن ءبىلدىردى.
- بارشاڭىزعا ءمالىم، قازىر «تازا قازاقستان» اكسياسى باستالدى. بۇل - وتە ماڭىزدى الەۋمەتتىك، ءتىپتى ساياسي جوبا. ونىڭ تۇپكى ءمانى - ۇلتتى ورتاق ىسكە ۇيىستىرىپ، ەلىمىزدى كوركەيتە ءتۇسۋ، حالقىمىزدىڭ جاڭا ەكولوگيالىق سانا-سەزىمىن دامىتۋ. بۇعان، ەڭ الدىمەن، وزدەرىڭىز سياقتى ادال ازاماتتار ۇيىتقى بولادى. ەل مۇددەسى ءۇشىن جاسالعان ەڭبەك پەن ەرلىك ەشقاشان ۇمىتىلمايدى. سوندىقتان بۇگىنگى ماراپاتتى حالىقتىڭ سىزدەرگە دەگەن زور العىسى دەپ قابىلداعان ءجون، - دەدى پرەزيدەنت.
ماراپاتتاۋ راسىمىندە «زاعيپتار ارمانى» مۇگەدەكتەر قوعامدىق بىرلەستىگىنىڭ ءىس جۇرگىزۋشىسى ءاليا دوسمۇحانوۆا، «وسنوۆانيە» جاۋاپكەرشىلىگى شەكتەۋلى سەرىكتەستىگىنىڭ ەكسكاۆاتورشىسى ۆلاديمير ساريك جانە «قازسۋشار» رەسپۋبليكالىق مەملەكەتتىك كاسىپورنى اقتوبە فيليالىنىڭ سۋ بەرۋدى رەتتەۋشىسى شىڭعىستاۋ ابديەۆ ءسوز سويلەدى.
بۇدان كەيىن مەملەكەت باسشىسى سۋ تاسقىنىنا قارسى شارالارعا بەلسەنە اتسالىسقان ءبىر توپ قۇتقارۋشىنى، ۆولونتەرلەر مەن قوعام بەلسەندىلەرىن، اسكەري قىزمەتشىلەر مەن دارىگەرلەردى، قاراپايىم جۇمىسشىلاردى، سونداي-اق كاسىپكەرلەر مەن ءىرى بيزنەس وكىلدەرىن ماراپاتتادى.
اۆتور
ابىلايحان جۇماشيەۆ