اقوردا پرەزيدەنتتىڭ 30-قىركۇيەككە دەيىنگى جۇمىس كەستەسىن جاريالادى
استانا. KAZINFORM - اقوردانىڭ رەسمي سايتىندا پرەزيدەنتتىڭ 30-قىركۇيەككە دەيىنگى جۇمىس كەستەسى جاريالاندى.
26-قىركۇيەكتە مەملەكەت باسشىسى قاسىم-جومارت توقايەۆ قازاقستان رەسپۋبليكاسى پرەزيدەنتى جانىنداعى عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىن وتكىزەدى.
27-قىركۇيەكتە استاناعا ميانما پرەزيدەنتىنىڭ مىندەتىن اتقارۋشى، مەملەكەتتىك اكىمشىلىك كەڭەس ءتوراعاسى مين اۋن حلاين ساپارمەن كەلەدى. اقوردادا ەكى ەل اراسىنداعى ىنتىماقتاستىق ماسەلەلەرى تالقىلاناتىن جوعارى دەڭگەيدەگى كەلىسسوزدەر جۇرگىزۋ جوسپارلانىپ وتىر.
29-30-قىركۇيەك كۇندەرى قاسىم-جومارت توقايەۆتىڭ شاقىرۋىمەن يتاليا پرەزيدەنتى سەردجو ماتتارەللا ەلىمىزگە رەسمي ساپارمەن كەلەدى. مەملەكەتتەر باسشىلارى كەلىسسوز جۇرگىزىپ، ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىقپالداستىقتى نىعايتۋ پەرسپەكتيۆالارىن تالقىلايدى.
ايتا كەتەيىك، پرەزيدەنت كەشە رەسەي مەن ۋكراينا كەلىسسوزدەرىنە قاتىستى قازاقستاننىڭ ۇستانىمىن ءبىلدىردى.