مەملەكەت باسشىسىنىڭ تاپسىرماسى بويىنشا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جاڭعىرتۋدان وتكەن اۋرۋحانانىڭ جۇمىسىمەن دەنساۋلىق ساقتاۋ ءمينيسترى اقمارال ءالنازاروۆا تانىستى.
جاڭعىرتۋ ناتيجەسىندە اۋرۋحاناداعى توسەك سانى 154 تەن 172 گە دەيىن ۇلعايتىلدى. كارديوحيرۋرگيا، نەيروحيرۋرگيا، ەندوكرينولوگيا، ۋرولوگيا جانە بالالار حيرۋرگياسى سياقتى جاڭا باعىتتار اشىلدى.
انگيوگراف ورناتىلعاننان كەيىن مۇندا قازىردىڭ وزىندە 160 قا جۋىق وپەراتسيا جاسالدى. بۇعان دەيىن ءجىتى كورونارلىق سيندرومى بار پاتسيەنتتەر اتباساردان 200 شاقىرىمنان استام قاشىقتىقتا ورنالاسقان وبلىس ورتالىعىنا جىبەرىلەتىن. ەندى قاجەتتى مەديتسينالىق كومەكتى جەرگىلىكتى جەردە الا الادى.
اتباسار اۋرۋحاناسى مەديتسينالىق ينفراقۇرىلىمدى جاڭعىرتۋ جانە دارىگەرلەردى جۇيەلى تۇردە قولداۋ وڭىرلەردەگى كادر تاپشىلىعى ماسەلەسىن شەشۋگە مۇمكىندىك بەرەتىنىنىڭ ناقتى مىسالىنا اينالدى.
سوڭعى ەكى جىلدا مۇندا 51 مامان تارتىلدى، ونىڭ 22 ءسى بيىل جۇمىسقا ورنالاستى. بۇگىندە اۋرۋحانادا 85 دارىگەر ەڭبەك ەتەدى. ماماندارعا، ونىڭ ىشىندە بۇعان دەيىن تاپشىلىق بولعان باعىتتار بويىنشا قاجەتتىلىك تولىق قامتاماسىز ەتىلدى.
مەديتسينا قىزمەتكەرلەرىنە قىزمەتتىك تۇرعىن ءۇي جانە 8,5 ميلليون تەڭگە كولەمىندە الەۋمەتتىك تولەمدەر كوزدەلگەن.
مينيستر بوساندىرۋ بولىمشەسىنە دە بارىپ، وندا سەگىز ايدىڭ ىشىندە 270 بوساندىرۋ جۇرگىزىلگەنىن كوردى. جاس انالارمەن اڭگىمەلەسىپ، جاڭا تۋعان نارەستەلەرگە سىيلىقتار تابىس ەتتى. بولىمشە اكۋشەر-گينەكولوگتارمەن تولىق جاساقتالعان.
ساپار بارىسىندا اقمارال ءالنازاروۆا مەديتسينا ۇجىمىمەن اۋرۋحانانى ودان ءارى دامىتۋ، ءدارى-دارمەكپەن قامتاماسىز ەتۋ جانە مەديتسينالىق كومەكتىڭ قولجەتىمدىلىگىن ارتتىرۋ ماسەلەلەرىن تالقىلادى.
بۇگىندە اتباسار اۋرۋحاناسى اقمولا وبلىسىنىڭ بەس اۋدانىندا تۇراتىن 106 مىڭنان استام تۇرعىن ءۇشىن دياگنوستيكا مەن ەمدەۋ مۇمكىندىكتەرىن كەڭەيتىپ، اۋىل حالقىنا مامانداندىرىلعان مەديتسينالىق كومەكتى بارىنشا جاقىنداتىپ وتىر.
وسىعان دەيىن«اۋىلدىق دەنساۋلىق ساقتاۋدى جاڭعىرتۋ» جوباسى اياسىندا مەديتسينالىق نىسان سالۋ جوسپارى 100 پايىز ورىندالعانى تۋرالى جازدىق.