قايعىلى جاعداي شورتاندى اۋدانىندا بولعان. پويىز دەر كەزىندە توقتاپ ۇلگەرمەي، تەمىرجول ۇستىندە بولعان ەر ادامدى قاعىپ كەتكەن. ول العان جاراقاتىنان كوز جۇمعان.
كولىك پوليتسياسى دەپارتامەنتىنىڭ مالىمەتىنشە، 19-قاراشادا استانا ستانسياسىنداعى كولىك پوليتسياسى باسقارماسى قىلمىستىق ءىس قوزعاعان. ءىس تەمىرجول كولىگىنىڭ قوزعالىسى نەمەسە ونى پايدالانۋ قاۋىپسىزدىگى ەرەجەلەرىن بۇزۋ سالدارىنان ابايسىزدا ادام ولىمىنە اكەپ سوعۋ دەرەگى بويىنشا قوزعالعان.
- قازىر قاجەتتى تەرگەۋ امالدارى جۇرگىزىلىپ، وقيعانىڭ سەبەپتەرى مەن ءمان-جايى انىقتالىپ جاتىر. ق ر قىلمىستىق- پروتسەستىك كودەكسىنىڭ 201-بابىنا سايكەس وزگە اقپارات جاريا ەتىلمەيدى، - دەپ ءتۇسىندىردى ۆەدومستۆو وكىلدەرى.
پوليتسيا تۇرعىندارعا تەمىرجولداعى قاۋىپسىزدىك ەرەجەلەرىن ەسكە سالدى.
- تەمىرجولدان تەك ارنايى بەلگىلەنگەن جەرلەردەن وتىڭىزدەر. پويىزدىڭ دىبىستىق بەلگىسىن ەستۋ ءۇشىن تەمىرجول ماڭىندا قۇلاققاپتى شەشىپ، باسكيىمنىڭ كۇلاپاراسىن تۇسىرىڭىزدەر. پويىز ءوتىپ بارا جاتقاندا پلاتفورمانىڭ شەتىندە تۇرماڭىزدار. ۆاگونداردىڭ توبەسىنە شىقپاڭىزدار. جوعارى كەرنەۋلى ەلەكتر توگى ادام ومىرىنە اسا قاۋىپتى، - دەپ ەسكەرتتى پوليتسيا وكىلدەرى.
ەسكە سالايىق، بۇعان دەيىن ەكىباستۇزدا تەمىرجول ستانساسىنىڭ جۇمىسشىسى ۆاگون استىندا قالىپ، قازا تاپقانى حابارلانعان ەدى.