اقمولا وبلىسىندا ءبىر تاۋلىكتە ءۇش بىردەي جول اپاتى بولىپ، التى ادام قازا تاپتى

استانا. قازاقپارات - 18-قاراشادا اقمولا وبلىسىنىڭ تاسجولدارىندا ءۇش بىردەي جول-كولىك وقيعاسى بولىپ، سالدارىنان التى ادام كوز جۇمدى.

Фото: Kazinform/ИИ

بۇل تۋرالى اقمولا وبلىسى پوليتسيا دەپارتامەنتىنىڭ باسپا ءسوز قىزمەتى حابارلادى.

ۆەدومستۆو مالىمەتىنشە، العاشقى جول اپاتى «جەزقازعان - ارقالىق - پەتروپاۆل» اۆتوجولىنىڭ 412-شاقىرىمىندا Renault Sandero جانە ۆاز-2106 كولىكتەرىنىڭ قاتىسۋىمەن بولعان.

- جول-كولىك وقيعاسى سالدارىنان ۆاز -2106 اۆتوكولىگىنىڭ جۇرگىزۋشىسى مەن ەكى جولاۋشىسى وقيعا ورنىندا كوز جۇمدى. Renault Sandero كولىگىنىڭ جۇرگىزۋشىسى ءتۇرلى دەنە جاراقاتتارىمەن مەديتسينالىق مەكەمەگە جەتكىزىلدى. قازىرگى ۋاقىتتا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. ونىڭ ناتيجەسى بويىنشا پروتسەسسۋالدىق شەشىم قابىلدانادى،-دەپ حابارلادى ۆەدومستۆو وكىلدەرى.

ەكىنشى جول اپاتى «استانا-اتباسار-جاقسى» اۆتوجولىنىڭ 252-شاقىرىمىندا تىركەلگەن. Hyundai Accent كولىگىنىڭ جۇرگىزۋشىسى جولدى بەلگىلەنبەگەن جەردەن كەسىپ وتپەك بولعان جاياۋ جۇرگىنشىنى قاعىپ كەتكەن. سالدارىنان جاياۋ جۇرگىنشى العان جاراقاتتارىنان وقيعا ورنىندا كوز جۇمدى. اتالعان دەرەك بويىنشا دا پوليتسەيلەر تەرگەۋ جۇمىستارىن باستادى.

ال ءۇشىنشى جول اپاتى «ارشالى-ەرەيمەنتاۋ-پاۆلوۆكا» اۆتوجولىنىڭ 19-شاقىرىمىندا، تايباي اۋىلىنىڭ ماڭىندا بولعان. Honda Odyssey كولىگىنىڭ جۇرگىزۋشىسى رۋلگە يە بولا الماي، كولىكتى اۋدارىپ العان.

- جول-كولىك وقيعاسى سالدارىنان اۆتوكولىكتىڭ ەكى ايەل جولاۋشىسى وقيعا ورنىندا كوز جۇمدى. جۇرگىزۋشى مەن ەكى جولاۋشى ءتۇرلى دەنە جاراقاتتارىمەن مەديتسينالىق مەكەمەگە جەتكىزىلدى. قازىرگى ۋاقىتتا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. ونىڭ ناتيجەسى بويىنشا پروتسەسسۋالدىق شەشىم قابىلدانادى، - دەپ تولىقتىردى پوليتسيا وكىلدەرى.

ءوڭىر پوليتسەيلەرى جۇرگىزۋشىلەردى جول قوزعالىسى ەرەجەلەرىن قاتاڭ ساقتاۋعا، جىلدامدىق رەجيمىنەن اسىرماۋعا جانە جولدا بارىنشا مۇقيات بولۋعا شاقىردى.

ايتا كەتەيىك، الماتىدا ءورت ءسوندىرۋ كولىگى جول اپاتىنا ۇشىراپ، ءبىر ادام قايتىس بولدى.