پرەزيدەنت تاپسىرماسىنا ساي جەرگىلىكتى بيلىك وڭىردە ەت كلاستەرىن قۇرىپ، ەكسپورتتىڭ الەۋەتىن ارتتىرۋعا كۇش سالىپ جاتىر، دەپ حابارلايدى 24KZ.
قازىر ءبىز وبلىس ورتالىعىنا شالعاي ورنالاسقان ەرەيمەنتاۋ اۋدانىنا قاراستى تورعاي اۋىلىنداعى شارۋاشىلىقتا تۇرمىز. بۇل سەرىكتەستىك مال شارۋاشىلىعىمەن 10 جىلعا جۋىق اينالىسادى. قازىر مۇندا 500-گە جۋىق ءىرى قارا مەن 4 مىڭنان استام قوي بار. ال دايىن ونىمدەرىن ىشكى نارىقتان بولەك، بىرىككەن اراب امىرلىكتەرى مەن كاتار مەملەكەتتەرىنە ەكسپورتتايدى. قازىر شارۋاشىلىق مەملەكەتتىك قولداۋدىڭ ارقاسىندا مال باسىن كوبەيتىپ جاتىر.
ماسەلەن، وتكەن اپتادا اسىل تۇقىمدى مىڭ ءبىر ءجۇز باس «دورپەر» قويىن سوناۋ اۋستراليادان اكەلگەن. ءبىر ەرەكشەلىگى بۇل قويلار ەتتى كەلەدى. مىسالى، ءبىر ايلىق قوزىسىنىڭ سالماعى 25 كەلىگە جەتسە، ۇلكەن قوشقاردىڭ سالماعى 140 كەلىدەن اسادى. تاعى ءبىر ەرەكشەلىگى، دورپەر قويلارى قىرقۋدى مۇلدەم قاجەت ەتپەيدى.
جالپى، وڭىردە وسىنداي ەت كلاستەرىن قۇرۋدا قانشا جوبا جۇزەگە اسىپ جاتىر؟ بۇل تۋرالى جاۋاپتى مامانداردان سۇراپ بىلسەك.
- نۇربەك باقتىباي ۇلى، پرەزيدەنت پارمەنىنە وراي وڭىردە ەت كلاستەرىن قۇرۋدا قانداي جوبالار جۇزەگە اسۋدا؟ شارۋالار ءۇشىن قانداي ءتيىمدى باعدارلامالار بار؟
- قازىر ايماقتا وسىنداي 10 عا جۋىق بورداقىلاۋ الاڭى جۇمىس ىستەيدى. بىلتىر وڭىردە 210 مىڭ توننا ەت ءوندىرىلدى. ەتتى قايتا وڭدەۋدە ءوسىم بار. ماسەلەن، جىل باسىنان بەرى ەت ءوندىرىسى 76 مىڭ تونناعا جەتكەن. بۇل بىلتىرعى جىلدىڭ سايكەس كەزەڭىمەن سالىستىرعاندا 4 پايىزعا ارتىق.