مال يەسىنە كەلتىرىلگەن شىعىن 25,4 ميلليون تەڭگەدەن استى. قازىرگى ۋاقىتتا ۇرلانعان جىلقىلاردىڭ 40 تان استامى يەسىنە قايتارىلدى.
پوليتسيانىڭ حابارلاۋىنشا، بيىل مامىر ايىندا پوليتسياعا ەرەيمەنتاۋ اۋدانىنداعى اۋىلداردىڭ بىرىندە ەركىن جايىلىمدا جۇرگەن 77 جىلقىنىڭ جوعالعانى تۋرالى ارىز تۇسكەن. وسى فاكتى بويىنشا قىلمىستىق ءىس قوزعالىپ، كۇدىكتىلەردى انىقتاۋ ءۇشىن ارنايى جەدەل توپتار قۇرىلدى.
كريمينالدىق پوليتسيا باسقارماسىنىڭ قىزمەتكەرلەرى اۋداندىق پوليتسيا بولىمىندەگى ارىپتەستەرىمەن بىرلەسىپ، بىرنەشە اي بويى جەدەل-ىزدەستىرۋ شارالارىن جۇرگىزدى. ولار بۇرىن مال ۇرلىعى ءۇشىن سوتتالعانداردى تەكسەرىپ، ەت بازارلارى مەن ۇرلانعان مالدى وتكىزۋى مۇمكىن باسقا دا ورىنداردى زەرتتەدى.
ناتيجەسىندە كۇدىكتىلەردىڭ جەكە باسى انىقتالدى. ولار ستەپنوگورسك قالاسىنىڭ تۇرعىندارى - اكەسى مەن بالاسى بولىپ شىقتى.
تەرگەۋ مالىمەتىنشە، كۇدىكتىلەر كوكتەمدە ۇرلانعان جىلقىلاردى ەرەيمەنتاۋ اۋدانىنان ستەپنوگورسك قالاسىنا ايداپ اكەتكەن. ولار مالدى قالا سىرتىنداعى قورالاردا ۇستاپ، كەيىن بىرتىندەپ ساتقان.
كۇدىكتىلەر ۇستالعاننان كەيىن پوليتسەيلەر جىلقىلاردىڭ 40 تان استامىن تاۋىپ، يەسىنە قايتاردى. قازىرگى ۋاقىتتا اكەسى مەن بالاسى قاماۋدا وتىر.