اقتوبەنىڭ ىشكى تۋريزمىندە قاي باعىتتار سۇرانىسقا يە
اقتوبە. KAZINFORM - اقتوبە وبلىسى بويىنشا قازىر 18 تۋريستىك مارشرۋت بار. ءوڭىر تۇرعىندارى كوكتەمدە قاسقىر سارقىراماسىنا بارىپ جاتىر.
كەيىن اقتولاعاي بورلى تاۋى، اققۇمعا سۇرانىس ارتادى. Visit Aqtobe ورتالىعى بولسا، بيىل كۇزدە قىتايدا اقتوبەنىڭ تۋرمارشرۋتىنىڭ تانىستىرىلىمىن جاساۋدى جوسپارلاپ وتىر.
ءار اۋداننىڭ ءوز برەندى بار
اقتوبەدە بارلىق اۋداندا تۋريستىك مارشرۋت بار. ماسەلەن قوبدا اۋدانىندا ابات بايتاق، قوبىلاندى باتىر كەسەنەسى مەن ءاليا اۋىلى، بۇلاق اۋىلدارىنا بارۋعا بولادى. بۇل تۋريستىك مارشرۋت تاريحي تانىمدى كەڭەيتۋگە باعىتتالعان. كوبىنە وقۋشىلار مەن ستۋدەنتتەر بارادى.
ال ىرعىز اۋدانىندا ىرعىز- تورعاي تابيعي قورىعى مەن جامانشىڭ كراتەرىمەن تانىسۋعا بولادى.
ايتەكە بي اۋدانىندا كىشى ءجۇز حانى ءابىلقايىر جەرلەنگەن جەر بار. كەسەنە 2015 -جىلى كۇزدە سالىندى. شالعاي جەر بولعانىمەن، بۇل تاريحي، كيەلى مەكەن.
ويىلدىڭ كوكجار جارمەڭكەسى بولسا، تاريحي عيماراتتارى ساقتالعان جالعىز ورىن سانالادى.
ال اقتولاعاي مەن اققۇمعا ارنالعان تۋريستىك مارشرۋت سوڭعى جىلدارى عانا اشىلىپ، جوعارى سۇرانىسقا يە بولا باستادى. مۇندا قازاقستاندىقتارمەن قاتار، شەتەلدىكتەر دە قىزىعادى.
- جاز ايلارىندا باسقا ەلدەن، وبلىستان تۋريستەر كوپ كەلەدى. بىلتىر اقپاراتتىق تۋر ءوتىپ، دامۋعا سەرپىن بەرگەنى راس. وزگەدەن كورىپ، بىلگەن ادامدار «اقتولاعايعا، اققۇمعا اپار» دەپ ءجيى ۇسىنىس تاستادى. ال جەرگىلىكتى اقتوبەلىكتەر مارتوك ورمانى مەن قارعالىداعى قاسقىر سارقىراماسىنا بارادى. ماسەلەن قاسقىر سارقىراماسىنا بارۋ قۇنى 5 مىڭ تەڭگە بولادى. بۇل باعىت ءوز شىعىنىن ءوزى عانا وتەيدى. ءبىز كولىك جالدايمىز، گيدكە تولەيمىز. وزگە تابىس تا، شىعىن دا جوق. نەگىزى ءبىز، تۋروپەراتورلار شەتەلدىك تۋر ۇيىمداستىرىپ تابىس تابامىز، ال ىشكى ءتۋريزمنىڭ مارشرۋتتارى قوسىمشا جارناما الاڭى ىسپەتتى. وسى ارقىلى تەپە- تەڭدىكتى ساقتاۋعا بولادى، - دەدى تۋروپەراتور ەركەبۇلان ايمۇرات ۇلى.
ونىڭ ايتۋىنشا، بىلتىر وڭىرگە شەتەلدەن كوپ ادام كەلدى. گونكونگ، ۋكراينا، رەسەي، جاپونيا مەن قىتايدان دا كەلىپ، ارنايى اقتولاعاي باعىتىن تاڭداعاندار جەتەرلىك.
سونىمەن بىرگە شەتەلدىكتەر «ديماشتۋردى» تاڭدايدى. كوبىنە وڭىردە جىل سايىن وتكىزىلەتىن «باقىتتى بالا» بايقاۋىنا كەلىپ، ءانشى ديماش قۇدايبەرگەنمەن جۇزۋدەسۋدى ماقسات ەتەدى.
- سوڭعى جىلدارى ءانشىنىڭ ءوزى بۇل بايقاۋدىڭ قوناعى بولىپ كەلمەي ءجۇر. ءبىراق شەتەلدىكتەر سوندا دا كۇدەر ۇزبەي كەلىپ، ول وقىعان مەكتەپكە بارادى، ۇستازدارىمەن كەزدەسەدى. مۋزىكالىق كوللەدجگە بارىپ، ۇستازى مارات ايتىموۆپەن جۇزدەسەدى. ءوزى تۇرعان ۇيىنە دە بارادى، - دەدى ەركەبۇلان ايمۇرات ۇلى.
تۋروپەراتوردىڭ اقتوبەدە بۇرىنعى تۋرمارشرۋتتى قايتا جاڭعىرتۋعا ارنالعان جوبالارى دا بار. ول دا ءوڭىردىڭ تابيعي ەرەكشەلىگىن كورسەتۋگە ارنالعان باعىت.
- سوڭعى جىلدارى اقتوبە تۋريزمىندە ىلگەرىلەۋ بار. بيىل مۇعالجار اۋدانىنا بارعىمىز كەلەدى. وندا ورقاش تابيعي قاۋمالى مەن مۇعالجار تاۋلارىنىڭ بوكتەرىن ارالاساق دەيمىز. بۇرىننان جول بولماي، قيىنالعان ەدىك. سونىمەن بىرگە سۋ تاسقىنىنىڭ دا كەرى اسەرى ءتيىپ جاتىر. ويىل ورمانىنا بيىل بارا المايمىز. سەبەبى ول جاققا قاتىناس قيىندادى، سونىمەن بىرگە تۋريستەرگە قىزمەت كورسەتىپ وتىرعان جەكە كاسىپكەر دە تاسقىندا زارداپ شەكتى. باعاسى تۋرالى ايتار بولساق، ىشكى ءتۋريزمدى كوپ دەگەندە جىلىنا 1 مىڭ تەڭگەگە قىمباتتاتىپ جاتىرمىز. سەبەبى بىزگە قىزمەت كورسەتەتىن سالالاردا باعا ءوسىمى بار، - دەدى ەركەبۇلان ايمۇرات ۇلى.
اقتوبەنىڭ تۋريستىك باعىتتارىن تانىستىرۋ جالعاسادى
جەرگىلىكتى اكىمدىك اقتوبەنىڭ تۋرمارشرۋتتارىن تانىستىرۋ اقپاراتتىق جۇمىسىن جالعاستىردى. بىلتىر وسكەمەن، قوستاناي، شىمكەنت قالالارىندا، قىتايدىڭ پەكين، شانحاي، وڭتۇستىك كورەيانىڭ سەۋل قالالارىندا دا روۋد- شوۋ ءوتتى.
- بيىل - قازاقستاننىڭ قىتايداعى تۋريزم جىلى. ءبىز قىتايدا تانىستىرىلىم جاسادىق. ال قازان ايىندا سول ەلدە اقتوبە وبلىسىنىڭ كۇندەرى وتپەك. سونىمەن بىرگە بيىل قوناقۇيلەرمەن ارادا مەموراندۋمعا قول قويىلدى. ولار تۋريستەرگە %5-10 جەڭىلدىك جاسايدى. جوسپار بويىنشا «اقتوبە» ف ك بىرلەسىپ مۇراجاي اشۋدى جوسپارلاپ وتىرمىز. ايىنا ءبىر كۇن اشىق ەسىك كۇنى ءوتىپ، ادامداردىڭ تانىسۋىنا جاعداي جاسالۋى مۇمكىن. تۇرعىندار، تۋريستەر كىرىپ، الاڭدى كورىپ، تانىسسا دەيمىز. مۇنداي ءساتتى قانشاما بالا اڭساڭ ءجۇر؟ ! ءارى «جاندى ساباقتار» جوباسى اياسىندا وبلىستاعى تاريحي، مادەني ورىنداردى تانىستىرعىمىز كەلەدى. كوبىنە قالا بالالارى قامتىلادى. ءبىز قاۋىپسىزدىك ءۇشىن پوليتسيا، مەديتسينا قىزمەتكەرلەرىن قاتار ەرتىپ جۇرەمىز. ونى ءبىز قىركۇيەك ايىنا بەكىتىپ وتىرمىز. بالالار مارتوك، قارعىلى اۋداندارىنا ساپارعا شىعىپ، ءتۇرلى نىسانداردى ارالايدى، - دەدى Visit Aqtobe تۋريستىك- اقپاراتتىق ورتالىعىنىڭ ديرەكتورى مانات تايپاقوۆ.
ونىڭ ايتۋىنشا، كوپشىلىك تۋريستىك جەرلەردى الەۋمەتتىك جەلى ارقىلى تانيدى. سوندىقتان سول ايماقتار الدىن الا ءتۇسىرىلىپ، كوپشىلىككە تانىستىرىلادى.
- ءساۋىر، مامىر ايلارىندا قارعالى اۋدانىنداعى قىسقىر سارقىراماسىنا ءجيى بارادى. ول جاقتا الدىمەن ءبىز مونيتورينگ جۇرگىزەمىز. تازالىعىن قاراپ، جاعدايىن باقىلايمىز. ءساۋىر- مامىر ايلارىندا 15-16 مىڭ ادام قامتىلدى. اسىرەسە سەنبى، جەكسەنبى كۇندەرى كوپ بارادى، - دەدى مانات تايپاقوۆ.
ايتا كەتەيىك، اقتوبەگە بىلتىر 186 مىڭنان استام ادام كەلدى. ونىڭ 162 مىڭى ىشكى تۋريستەر بولسا، وزگەسى شەتەلدىك. اقتوبەدە تۋرمارشرۋتتار ەكولوگيالىق، مادەني- تانىمدىق، كيەلى جەرلەر باعىتى دەپ بولىنەدى.