اقتوبەلىك ستۋدەنتتەر ديماش قۇدايبەرگەننىڭ تۋعان كۇنىنە سىيلىق جاسادى

اقتوبە. KAZINFORM - ا. جۇبانوۆ اتىنداعى اقتوبە مۋزىكالىق كوللەدج ستۋدەنتتەرى ءانشى ديماش قۇدايبەرگەننىڭ رەپەرتۋارىنداعى اندەردى شىرقادى.

ونىڭ ۇستازى مارات ءايتىموۆ بەينەقۇتتىقتاۋىن جەتكىزىپ، ءانشىنىڭ ستۋدەنت كۇنىندەگى قىزىقتارىن ايتىپ بەردى.

بۇگىن ءانشى ديماش قۇدايبەرگەن 30 جاسقا تولدى. تۋعان كۇنىنە وراي ا. جۇبانوۆ اتىنداعى اقتوبە مۋزىكالىق كوللەدج ستۋدەنتتەرى مۋزىكالىق كەش وتكىزدى. وندا ءانشىنىڭ رەپەرتۋارىنداعى اندەر ورىندالدى.

- ديماشتىڭ رەپەرتۋارىنداعى «قازاقستان» ءانىن كۆارتەت بولىپ ورىندادىق. پاتريوتتىق سەزىمدى وياتىپ، رۋح بەرەتىن ءان بىزگە دە ۇنايدى. ءبىز ديماشقا ۇقساتىپ ەمەس، ءوز بوياۋىمىزبەن شىرقاپ شىقتىق. ءوزىم ءانشىنى كورمەدىم. مەنىڭ ويىمشا كوللەدج ستۋدەنتتەرىنىڭ ءبارى دە ونىمەن جۇزدەسكىسى كەلەدى دەپ ويلايمىن. ءبىزدىڭ كوللەدجدە ونىڭ اتى ءجيى ايتىلىپ، قۇرمەت كورسەتىلەدى، - دەدى كوللەدج ستۋدەنتى گۇلىم سەرىك.

ديماش قۇدايبەرگەن ا. جۇبانوۆ اتىنداعى اقتوبە مۋزىكالىق كوللەدجدە قازاقستاننىڭ ەڭبەك سىڭىرگەن قايراتكەرى مارات ايتىموۆتەن ءدارىس الدى. قازىر ۇستازى ونىڭ تۇركيادا وتەتىن كونسەرتىنە قاتىسۋعا جولعا شىققان. اقتوبەدەگى كەشتە ونىڭ بەينەقۇتتىقتاۋى قوسىلىپ، ءانشىنىڭ ستۋدەنت كۇندەردەگى قىزىقتى وقيعالارى ايتىلدى.

- ديماش 2010-جىلى ا. جۇبانوۆ اتىنداعى اقتوبە مۋزىكالىق كوللەدجىنىڭ ءان سالۋ ءبولىمى اكادەميالىق ءان سالۋ ماماندىعىنا قابىلداندى. ديماشتى كىلەڭ 5 كە وقىدى دەپ ايتا المايمىن. وزىنە ۇناعان پاندەردى جاقسى وقىدى، وزىنە ۇناماعانىنا جانىن سالا قويمادى. كىلەڭ 5 كە وقىماسا دا ۇلكەن جەتىستىكتەرگە جەتكەنىن، جالعىز ءبىز ەمەس، بۇكىل الەم مويىنداپ وتىرعانىن ايتۋىمىز كەرەك. كەزەكتى رەت ساباققا كەشىگىپ قالعان كەزدە ميۋا اپامىزعا حابارلاسىپ، «اپا، ديماش جوق، وياتىڭىز دا، جىبەرىڭىز» دەگەندە، «مارات، ەكەۋلەپ ءجۇرىپ وسى بالانى بىتىرتەيىك» دەپ ايتقانى ءالى ەسىمدە. ەڭ باستىسى ادامعا دەگەن باۋىرمالدىعى، جۇرەگىنىڭ ەلجىرەپ تۇراتىندىعى، كومەكتەسكىسى كەلىپ تۇراتىنى بار. باسقا بالالاردان ايىرماشىلىعى دەگەنگە وتە تاربيەلى، كورەگەندىگى دەپ ايتار ەدىم. بەرگەن ۋادەسىن ەشقاشان ۇمىتپايدى، - دەدى ۇستازى مارات ءايتىموۆ.

كوللەدجدە قازىر 300 دەن استام ستۋدەنت بار. مۇندا الەمنىڭ بىرنەشە ەلىنەن ءانشىنىڭ جانكۇيەرلەرى كەلىپ، ءبىلىم العان وقۋ ورنىن كورىپ، ۇستازىمەن كەزدەسەدى.

- بىلتىر ءبىر ايدا الەمنىڭ 30 ەلىنەن جانكۇيەرلەرى كەلدى. بيىل دا كەلىپ جاتىر. كوبىنە كونتسەرت، بايقاۋلار كەزىندە كەلەدى. ۇستازى مارات ءايتىموۆ تۇركيا ەلىندە وتەتىن كونتسەرتىنە كەتتى. ءبىز كوللەدج اتىنان ارنايى شاپان تىكتىرىپ، سىيىمىزدى بەرىپ جىبەردىك. جالپى ءانشىنىڭ تۋعان كۇنىندە ءبىز وسىنداي مادەني كەش ۇيىمداستىرامىز. ءداستۇرلى شارا شامامەن 5-6 جىلدان بەرى ۇيىمداستىرىلىپ كەلەدى، - دەدى ا. جۇبانوۆ اتىنداعى اقتوبە مۋزىكالىق كوللەدجى ديرەكتورىنىڭ مىندەتىن اتقارۋشى ادىلەت كۇزەنبايەۆ.