اقتوبەلىك قولونەر شەبەرلەرى 155 جىلدىققا 155 مەتر كورپە تىكتى
اقتوبە. KAZINFORM - اقتوبە قالاسىنىڭ 155 جىلدىعى اياسىندا قولونەر شەبەرلەرى 155 مەترلىك كورپە تىكتى. ءبارى دە سۋ تاسقىنىنان زارداپ شەككەن اقتوبەلىكتەرگە تاراتىلادى.
اقتوبە قالاسىنىڭ 155 جىلدىعى بيىل «كۇشىمىز بىرلىكتە» ۇرانىمەن ءوتتى.
ۇيىمداستىرىلعان شارانىڭ بارىنە سۋ تاسقىنىنان زارداپ شەككەن تۇرعىندار قاتىسىپ، ەتنوفەستيۆالدە تىگىلگەن كورپە ارنايى سول ادامدار تاراتىلدى.
- ەتنوفەستيۆالدىڭ ءبىر ءبولىمى كورپە party دەپ اتالدى. وعان قۋرايلى مادەنيەت ءۇيى جاۋاپتى دەپ بەكىتىلدى. اقتوبە قالاسىنداعى شەبەرلەردىڭ باسىن قوسقان چاتقا كىرىپ، قانداي جۇمىس اتقارا الاتىنىمىزدى تالقىلادىق. ۇزىندىعى 2 مەتر 30 س م بولاتىن 67 كورپە تىگىلدى. شەبەرلەر اراسىندا جەكە كاسىپكەرلەر دە، مەكتەپ مۇعالىمدەرى دە بار. بارلىعى 46 شەبەر قاتىستى. كورپەنىڭ ءبارى سۋ تاسقىنىنان زارداپ شەككەن وتباسىلارعا تاراتىلادى، - دەدى قۋرايلى مادەنيەت ءۇيىنىڭ كوركەمدىك جەتەكشىسى ساندۋعاش تاۋبايەۆا.
ۇسىنىس تۇسكەندە اقتوبەلىك شەبەرلەر بىردەن كەلىسكەن. ولار ويۋ-ورنەكتىڭ ءمان-ماعىناسىنا تەرەڭ ءۇڭىلدى.
- مۇنى 10 كۇندەي ۋاقىتتا تىگىپ شىقتىق. قىزعالداق كوكتەمنىڭ، اقتوبەنىڭ دە سيمۆولى. ال قۇرساق ويۋدى تاڭداعانىمىزدىڭ سەبەبى اقتوبەمىزدىڭ قوينىندا نەبىر بايلىعىمىز بار. سونى كورسەتكىمىز كەلدى. جەرىمىز كوك، مولشىلىق بولسىن دەگەن نيەتپەن جاسىلدى، كوز تيمەسىن دەپ قىزىلدى قولداندىق. ءوزىم التى كورپە تىگىپ، سىيلادىم. ءار كورپەگە 3,3-3,6 كەلى ماقتا سالدىق. ءدال وسىنداي ۇلگىدە العاش تىگىپ وتىرمىز. بۇل بىرنەشە شەبەردىڭ يدەياسى نەگىزىندە تىگىلدى، - دەدى شەبەر ايگۇل.
ايتا كەتەيىك، ەتنوفەستيۆال اياسىندا كيىز باسى، ۇرشىق ءيىرۋ شەبەرلىك ساباعى مەن ۇلتتىق سپورتتان سايىس ءوتتى.
اۆتور
التىناي ساعىندىقوۆا