اقتوبەلىك كاسىپكەر تاسقىننان زارداپ شەككەن تۇرعىندارعا مال جانە تۇقىم بەردى

اقتوبە. KAZINFORM - اقتوبەلىك كاسىپكەر امانعوس تولەۋوۆ سۋ تاسقىنىنان ەڭ كوپ زارداپ شەككەن قوبدا جانە ويىل اۋداندارىنا 100 توننا بيداي، 100 توننا ارپا تۇقىمى مەن مال بەردى.

اقتوبە وبلىسىندا سۋ تاسقىنىنان زارداپ شەككەندەرگە كومەك كورسەتۋ ءۇشىن قوعامدىق قور جۇمىس ىستەپ تۇر. سونىمەن بەرگە جەرگىلىكتى كاسىپكەرلەر دە كومەكتەسىپ جاتىر.

- ۇجىم كومەكتەسۋگە شەشىم قابىلدادى. ەل ءۇشىن ەڭبەك ەتىپ، اۋىلدى دا كوركەيتىپ جۇرگەن ازاماتتارعا دەپ 100 توننا بيداي، 100 توننا ارپا، 50 توننا سۋدان ءشوبىنىڭ تۇقىمىن ءبولۋ ءجون دەپ سانادىق. سونىمەن بىرگە 200 قوي، 50 ءىرى قارا بەرىپ وتىرمىز. اقتوبە وبلىستىق اۋىل شارۋاشىلىعى باسقارماسىمەن اقىلداسا كەلە ويىل اۋدانىنا 40 توننا ارپا، 25 توننا سۋدان ءشوبىنىڭ تۇقىمىن، 200 قوي مەن 50 قاشاردى بولەتىن بولدىق. قالعانى قوبدا اۋدانىنا بەرىلەدى. حالىقتى ەشكىم دالادا قالدىرىپ جاتقان جوق. ءبىرىنشى كۇننەن باستاپ پرەزيدەنتىمىز، ۇكىمەت باسشىسى دا ايتىپ، ەل بولىپ كومەگىن بەرىپ جاتىر. «ەشكىمدى سىرت قالدىرمايمىز، ءبارىنىڭ شىعىنىن وتەيمىز» دەدى. بۇل ۇلكەن دەمەۋ، - دەدى اقتوبەلىك كاسىپكەر امانعوس تولەۋوۆ.

ونىڭ ايتۋىنشا، بالا كەزىندە قارعالى اۋدانىنا تىڭ يگەرۋشىلەر كەلگەن. بۇل 1957 -جىل بولاتىن. سول كەزدە امانعوس تولەۋوۆتىڭ اكەسى كوپبالالى ۋكراين وتباسىنا ءبىر بۇزاۋلى سيىرىن، 4-5 قوي بەرگەن. ول اكەسىنىڭ وسى ءىسىن ۇلگى تۇتىپ، جەرلەستەرىنە كومەك كورسەتۋدى ءجون سانادى.

- وت پەن سۋ - ءتىلسىز جاۋ. سۋ ءبىر- اق كۇندە كەلدى. قار كوپ بولدى، توڭ قالىڭ، نوسەر جاۋىن دا جاۋدى. قازىر ءبارى ارتتا قالدى. ەندى زارداپ شەككەندەرگە قولداۋ كورسەتۋ كەرەك، - دەدى ول.

اۆتور

التىناي ساعىندىقوۆا