اقتوبەدەگى اپات: تىكۇشاققا سوڭعى كۇردەلى جوندەۋ بىلتىر جاسالعان
استانا. KAZINFORM - قورعانىس مينيسترلىگى اقتوبە وبلىسىنداعى اۆياتسيالىق اپات بويىنشا تاعى دا رەسمي حابارلاما جاسادى.
قازاقستان رەسپۋبليكاسى قورعانىس ءمينيسترىنىڭ تاپسىرماسى بويىنشا وقيعا ورنىنا قورعانىس ءمينيسترىنىڭ ورىنباسارى - اۋە قورعانىسى كۇشتەرىنىڭ باس قولباسشىسى اۆياتسيا گەنەرال- لەيتەنانتى داۋرەن قوسانوۆ باسقاراتىن ارنايى كوميسسيا كەلدى.
- اۆياتسيالىق اپاتتىڭ الدىن الا سەبەبى تەحنيكالىق اقاۋلىق دەپ قاراستىرىلۋدا. الايدا تۇپكىلىكتى قورىتىندى تەرگەۋ ءىس-شارالارى جۇرگىزىلگەننەن كەيىن جاسالاتىن بولادى. زارداپ شەككەن ەكيپاج مۇشەلەرى قاجەتتى مەديتسينالىق كومەكپەن، ءدارى- دارمەكتەرمەن قامتاماسىز ەتىلگەن جانە مامانداردىڭ باقىلاۋىندا. قازا تاپقان اسكەري قىزمەتشىنىڭ تۋىستارىنا ماتەريالدىق تولەمدەر جانە بارلىق قاجەتتى قولداۋ كورسەتىلەدى، - دەلىنگەن حابارلامادا.
مي-8 تىكۇشاقتارى ەلىمىز تاۋەلسىزدىك العاننان بەرى اۋە قورعانىسى كۇشتەرىنىڭ قولدانىسىندا. تەحنيكانىڭ بۇل ءتۇرى 50-دەن استام ەلدە قولدانىلادى جانە ءوزىنىڭ كوپ فۋنكتسيونالدىعى مەن سەنىمدىلىگىنىڭ ارقاسىندا الەمدەگى ەڭ كوپ سۇرانىسقا يە تىكۇشاقتاردىڭ ءبىرى. بۇل تىكۇشاققا سوڭعى كۇردەلى جوندەۋ 2023 -جىلى الماتى قالاسىنىڭ «405 اۆياتسيالىق- جوندەۋ زاۋىتى» بازاسىندا جاسالدى. بارلىق رەگلامەنتتىك جۇمىستار، ونىڭ ىشىندە ۇشۋ الدىنداعى دايىندىق نورماتيۆتەرگە سايكەس ورىندالدى.
تىكۇشاق ەكيپاجىنىڭ دا ايتارلىقتاي تاجىريبەسى بار جانە كۇندىز دە، تۇندە دە قيىن مەتەورولوگيالىق جاعدايلاردا، ونىڭ ىشىندە توتەنشە جاعدايلارعا تاپ بولعان كەزدە دە تاپسىرمالاردى ورىنداۋ ءۇشىن كاسىبي تۇردە دايىندالعان.
ەسكە سالساق، مارتوك اۋدانى سارىجار اۋىلىندا تىكۇشاق اپاتقا ۇشىرىپ، جانىپ كەتتى.
بورتتا ءۇش ادام بولعان. ونىڭ بىرەۋى وقيعا ورنىندا كوز جۇمدى.
اۆتور
اينۇر تۋماكبايەۆا