اقتوبەدە وقۋشى قىزدار اراسىنداعى جانجالدان سوڭ اكىمشىلىك ءىس قوزعالدى

اقتوبە. KAZINFORM - اقتوبە قالاسىندا وقۋشى قىزدىڭ زامانداسىنا الىمجەتتىك جاساپ تۇرعان ءساتى ۆيدەوعا ءتۇسىپ قالىپ، كەيىن ول الەۋمەتتىك جەلى ارقىلى تاراپ كەتتى. پوليتسيا وقۋشىلاردىڭ جەكە باسىن انىقتاپ، اكىمشىلىك ءىس قوزعالدى.

وقيعا 10-شىلدە كۇنى اقتوبە قالاسىنىڭ ورتالىعىندا بولعان. بەينەماتەريالدان ءبىر قىزدىڭ ەكىنشى ءبىر قىزدى ىشىنەن، جامباسىنان تەپكىلەپ، بالاعاتتاپ جاتقانىن كورۋگە بولادى.

پوليتسيا وقيعاعا قاتىسى بار قىزداردىڭ كىم ەكەنىن انىقتادى.

- جانجالعا قاتىسقاندار مەن ولاردىڭ اتا-انالارى پوليتسيا بولىمىنە جەتكىزىلدى. كامەلەت جاسقا تولماعان قىزدىڭ اتا-اناسىنا اكىمشىلىك قۇقىقبۇزۋشىلىق تۋرالى كودەكستىڭ 345-بابى بويىنشا اكىمشىلىك ءىس قوزعالدى. قىز دا، ونىڭ اناسى دا كىناسىن تولىق مويىندادى. ءىس سوتقا جىبەرىلەدى. سونىمەن بىرگە قىزدار وقيتىن مەكتەپ ديرەكتورى مەن ونىڭ ورىنباسارى شاقىرتىلىپ، ءتۇسىندىرۋ جۇمىسى جۇرگىزىلدى. اكىمشىلىك قۇقىقبۇزۋشىلىق قايتالانباس ءۇشىن ەكى اراداعى جانجال سەبەبى جويىلۋى ءتيىس، - دەپ حابارلادى وبلىستىق پ د باسپا ءسوز قىزمەتىنىڭ جەتەكشىسى ەربولات سارقۇلوۆ.

ەسكە سالساق، بۇعان دەيىن استانادا جاپپاي توبەلەسكەندەرگە قاتىستى قىلمىستىق ءىس قوزعالعانىن جازعان ەدىك.

اۆتور
التىناي ساعىندىقوۆا