اقتوبەدە تاعى ءبىر اۋىلدىڭ حالقى ەۆاكۋاتسيالانىپ جاتىر

اقتوبە. KAZINFORM - ىرعىز اۋدانىندا قۇيلىس اۋىلىنىڭ تۇرعىندارىن ەۆاكۋاتسيالاۋ جۇمىسى باستالدى. مۇندا 500 دەن استام ادام تۇرادى.

ىرعىز اۋدانىندا بۇعان دەيىن نۇرا، مامىر جانە بەلشەر اۋىلدارىنان 900 گە جۋىق ادام ەۆاكۋاتسيالاندى. قازىرگى كەزدە مامىر مەن نۇرا اۋىلدارىنا سۋ كىرگەنى بەلگىلى.

ەندى توتەنشە جاعدايلار قىزمەتى، جەرگىلىكتى اتقارۋشى ورگان وكىلدەرى مەن ەرىكتىلەر قۇيلىس جانە جايساڭباي اۋىلدارىن سۋدان قورعاۋ ءۇشىن جاعالاۋدى بەكىتىپ، قۇم تولى قاپ توسەپ جاتىر.

- نۇرا اۋىلدىق وكرۋگى بويىنشا 34 ۇيگە، 5 عيماراتقا سۋ كىردى. مامىر اۋىلىندا 10 ۇيگە سۋ كىردى. مۇندا ەكى ءۇي قۇلادى. قازىر ءتاۋىپ اۋىلدىندا تۇرعىنداردى كوشىرۋ جۇمىسى ءجۇرىپ جاتىر. وندا 500 دەن استام ادام تۇرسا، ونىڭ جارتىسى ايەلدەر مەن بالا-شاعا. الدىمەن سولاردى، سونىمەن بىرگە زەينەتكەرلەردى كوشىرەمىز، - دەدى ىرعىز اۋدانىنىڭ اكىمى نۇرلان قىزبەرگەنوۆ.

ءتاۋىپ اۋىل وكرۋگىنىڭ اكىمى كامال تىلەۋجانوۆتىڭ ايتۋىنشا، ءقازىر اۋىلدا 7 تەحنيكا بار.

بۇل كولىكتەردىڭ ءبارى جاعالاۋدى قۇممەن بەكىتۋ، بيىكتەتۋ جۇمىستارىن جۇرگىزۋگە جۇمىلدىرىلعان.

- اۋىلدا 541 ادام تۇرادى. ولاردىڭ ءبىر توبىن تىكۇشاقپەن اۋدان ورتالىعىنا جىبەردىك. ايەلدەر مەن بالالار عانا كوشىرىلەدى، ال ەر ادامدار قالادى. جىلدام كوشىرۋ ءۇشىن تىكۇشاق قولدانىلىپ جاتىر. قازىر ءبىزدىڭ اۋىلدىڭ جان-جاعىندا سۋ بار. قايىقپەن، جول تالعامايتىن كولىكپەن وتۋگە بولادى. ءبىراق تىكۇشاق تەز ەۆاكۋاتسيالاۋعا مۇمكىندىك بەرەدى. نەگىزى بىزگە ىرعىز وزەنىنىڭ سۋى كەلدى. قازىر تورعاي وزەنىنىڭ سۋىنا دايىندىق جاساپ جاتىرمىز. ءبىز ىرعىز وزەنىنەن سۋ كەلەتىن سوڭعى نۇكتەنىڭ ءبىرىمىز. بىزدەن كەيىن جايساڭباي اۋىلى بار، - دەدى ءتاۋىپ اۋىلدىڭ وكرۋگىنىڭ اكىمى كامال تىلەۋجانوۆ.

ايتا كەتەيىك، بۇگىنگە دەيىن اۋىلداردان 887 ادام ەۆاكۋاتسيالاندى. ونىڭ 357 ى ەۆاكۋاتسيالىق پۋنكتكە ورنالاستى.

اۆتور
التىناي ساعىندىقوۆا