اقتوبەدە قىزمەتتىك كولىكتى ۇلىنا بەرىپ قويعان ينسپەكسيا باسشىسى تارتىپتىك جازاعا تارتىلدى
اقتوبە. KAZINFORM - اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باسشىسى ادىلكەرەي اۋەلبايەۆ قىزمەتتىك كولىكتى ءوز اۋلاسىنا قويىپ، ونى ۇلى ايداپ كەتكەن.
پوليتسيا ونىڭ ۇلىن ماس كۇيىندە ۇستاپ، اكىمشىلىك جاۋاپقا تارتتى. ال مەملەكەتتىك قىزمەتشى، اكەسى بۇگىن ادەپ جونىندەگى كەڭەستە سوگىس الدى.
اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى ادىلكەرەي اۋەلبايەۆتىڭ بالاسى باۋىرجان ساعيدۋللايەۆتىڭ ءىسى بيىل ماۋسىمدا قارالدى. ءىس ماتەريالىنا سۇيەنسەك، ب. ساعيدۋللايەۆ اۋلادا تۇرعان اكەسىڭ قىزمەتتىك كولىگىن ايداپ كەتىپ، مونشا ماڭىندا ماس كۇيىندە ۇستالعان. سوت قاۋلىسىمەن 15 تاۋلىككە قامالىپ، 7 جىلعا كولىك باسقارۋ قۇقىعىنان ايىرىلدى. بۇگىن وسى ءىس ادەپ جونىندەگى كەڭەستە قارالىپ، تالقىلاندى.
«قىزمەتتىك كولىك مەملەكەتتىك قىزمەتتى اتقارۋشى ءۇشىن بەرىلەدى. سونى اتقاراتىن ۋاقىتتا عانا پايدالانۋ كەرەك. جەكە باسىنا، وتباسىنا ارنالماعان كولىك. كولىككە تانىس، تۋىس وتىرا المايدى، وتىرۋعا قۇقىعى جوق. بۇل جەردە ءتۇن ورتاسىندا جۇرگەن. پوليتسيا ۇستادى، ماس كۇيىندە ەكەنى انىقتالدى. كىشكەنتاي مەكەمە ەمەس، وبلىستىق مەكەمە. ۇيدە بولماعانسىز، ەڭبەك دەمالىسىندا بولدىڭىز. اۋلاڭىزدا ەمەس، مەكەمەنىڭ اۋلاسىنا، بولماسا اۋىل شارۋاشىلىعىنا قاتىستى مەكەمەلەردە قالدىرۋ كەرەك ەدى. مەملەكەتتىك مۇلىك تەك قىزمەت بابىندا پايدالاناتىن نارسە. سوندىقتان قاتاڭ سوگىس بەرۋدى ۇسىنامىن. ۇجىمدا ەمەس، وتباسىندا ءتۇسىندىرۋ جۇمىستارىن جۇرگىزۋ كەرەك. ءاربىر ءىس- ارەكەت مەكەمەگە، جەكە باسىڭىزعا اسەر ەتۋى مۇمكىن. اينالىپ كەلگەندە مەملەكەتتىك قىزمەتپەن قوشتاسۋ دا مۇمكىن»، - دەدى مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتىنىڭ باسشىسى، ادەپ جونىندەگى كەڭەس ءتوراعاسى ايبەك ءشىلمانوۆ.
ادەپ جونىندەگى كەڭەس وتىرىسى كەزىندە اۋماقتىق ينسپەكسيا باسشىسى ادىلكەرەي اۋەلبايەۆ ەش قارسىلىق كورسەتپەدى.
«ءبارى دە راس. قانداي شەشىم شىعاراسىزدار، سونى قابىلدايمىن. بۇرىننان دا مەملەكەتتىك قىزمەتتە كەلە جاتىرمىن. رەتىن، زاڭدىلىقتاردى بىلەمىن. بولاشاقتا قىزمەتتى جالعاستىرا بەرەمىن دەگەن ويىم بار. قاي ۋاقىتتا دا اقتوبە وبلىسىنىڭ وركەندەۋىنە، كوركەيۋىنە قىزمەت جاساپ كەلە جاتىرمىن»، - دەدى ادىلكەرەي اۋەلبايەۆ.
ايتا كەتەيىك، ادەپ جونىندەگى كەڭەس مۇشەلەرى قاتاڭ سوگىس تۇرىندەگى تارتىپتىك جازاعا تارتتى.
اۆتور
التىناي ساعىندىقوۆا