اقتوبەدە قان-جوسا بولىپ، جانجالداسىپ جۇرگەن ادامدار جۇرتتى شوشىتتى

اقتوبە. KAZINFORM - اقتوبە قالاسىندا ادامدار اراسىندا توبەلەس بولىپ، كوشەدە قان-جوسا بولىپ جۇرگەن ەر ازاماتتار جۇرتتى قورقىتتى. قازىرگى كەزدە وقيعاعا قاتىسى بار كۇدىكتىلەردىڭ ءبارى انىقتالىپ، ۇستالدى.

وقيعا اقتوبە قالاسىنداعى 8 شاعىن اۋداندا بولعان. ۆيدەودان بىرنەشە ادامنىڭ قان-جوسا بولىپ جۇرگەنىن كورۋگە بولادى. سونىمەن بىرگە بىرنەشە پوليتسيا قىزمەتكەرى مەن جەدەل جاردەم بريگاداسىنىڭ وكىلى بار. العاشىندا كوپكە باعىنباي، قارسىلاسىپ جۇرگەن ادامنىڭ پىشاق جاراقاتىن العان بولۋى مۇمكىن ەكەنى، ءتىپتى بىرنەشە ادامدى جارالاعانى تۋرالى اقپارات تاراپ كەتتى. الايدا پوليتسيا بۇل اقپاراتتى جوققا شىعاردى.

- وقيعا تۋرالى حابارلاما كەلىپ تۇسكەننەن كەيىن دەرەۋ پوليتسيا جاساعى جىبەرىلىپ، زاڭسىز ارەكەتتەر توقتاتىلدى. وقيعاعا قاتىسۋشىلاردىڭ بارلىعى انىقتالىپ، پوليتسيا بولىمىنە جەتكىزىلدى. «دەنساۋلىققا زيان كەلتىرۋ» فاكتىسى بويىنشا قىلمىستىق ءىس قوزعالدى. قازىرگى ۋاقىتتا وقيعانىڭ ءمان-جايى انىقتالىپ جاتىر، - دەپ حابارلادى وبلىستىق پوليتسيا دەپارتامەنتىنىڭ باسپا ءسوز قىزمەتى.

اقتوبە وبلىستىق دەنساۋلىق ساقتاۋ باسقارماسىنىڭ حابارلاۋىنشا، جەدەل جاردەم وقيعا ورنىنا 19:58-دە باردى. 30 جاستاعى ەر ادامنىڭ موينىندا كەسىپ-تەسىلگەن جاراقات بولدى. ول اقتوبە مەديتسينا ورتالىعىنىڭ حيرۋرگيا بولىمىنە جەتكىزىلدى. ال 39 جاستاعى ەر ادامنىڭ سول جاق شىنتاعىندا كەسىلگەن جارا بولدى. ونى كوپسالالى وبلىستىق اۋرۋحاناعا جەتكىزدى.

«39 جاستاعى ايەل دە سول اۋرۋحاناعا وڭ جاق قولى جارالانىپ، جەتكىزىلگەنىمەن، جاتىپ ەم قابىلداۋدان باس تارتتى. 32 جاستاعى تاعى ءبىر ەر ادامنىڭ ەرنى جىرىلىپ، باسى جارالاندى. ول ىشىمدىك ىشكەن»، - دەپ حابارلادى اقتوبە وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى.

اۆتور
التىناي ساعىندىقوۆا