اقتوبەدە ۆەلوسيپەد ۇرلاپ، ساتۋمەن اينالىسقان ەر ادام قاماۋعا الىندى

استانا. KAZINFORM - اقتوبە پوليتسەيلەرى 13 ۆەلوسيپەد ۇرلاعان كۇدىكتىنى قولعا ءتۇسىردى.

Polisia.kz-تىڭ مالىمەتىنشە، قوس دوڭگەلەكتى كولىكتى ۇرلاۋ فاكتىسى بويىنشا پوليتسياعا وبلىس ورتالىعىنىڭ تۇرعىنى جۇگىنگەن. ارىزدانۋشىنىڭ ايتۋىنشا، ول ۆەلوسيپەدتى جۇمىس ورنىنىڭ الدىنا قويعان. الايدا جۇمىستان شىققان كەزدە ۆەلوسيپەدىنىڭ جوق ەكەنىن كورگەن.

پوليتسيا قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ كەزىندە كۇدىكتى رەتىندە 29 جاستاعى ازاماتتى انىقتاپ، پوليتسيا بولىمىنە جەتكىزدى. سونداي-اق ۇستالعان ادامنىڭ بۇدان باسقا تاعى 12 ۆەلوسيپەد ۇرلىعىنا قاتىسى بار ەكەنى انىقتالدى.

كۇدىكتى بەيتانىس ادامدارعا ۇرلانعان ۆەلوسيپەدتەردىڭ وزىنىكى ەكەنىن، ونى لومباردتان تەلەفونىن قايتارىپ الۋ ءۇشىن ساتىپ جاتقانىن ايتقان.

ۇرلىق فاكتىسى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. كۇدىكتى ۋاقىتشا ۇستاۋ يزولياتورىنا قامالدى.

پوليتسيا دەپارتامەنتى ازاماتتارعا ۇرلانعان زاتتاردى ساتىپ العانى ءۇشىن قىلمىستىق جاۋاپكەرشىلىك كوزدەلگەنىن ەسكە سالادى.

اۆتور
ابىلايحان جۇماشەۆ