اقتوبەدە جالعان ديپلوممەن جۇمىس ىستەپ كەلگەن ديرەكتورلار مەن باپكەرلەر جۇمىستان شىعارىلدى

اقتوبە. KAZINFORM - اقتوبەدە انتيكور سپورت سالاسىنداعى زاڭ بۇزۋشىلىقتاردى تەكسەرىپ، 10 ديرەكتور مەن باپكەردىڭ جالعان ديپلوممەن جۇمىس ىستەپ جۇرگەنىن انىقتادى. سونىمەن بىرگە سىياقىنى زاڭسىز بەرۋ دەرەگىن تىركەدى.

ق ر سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتى جەمقورلىق تاۋەكەلدەرى كارتاسىن جاسادى. وندا الەۋمەتتىك زەرتتەۋلەر، ارىزدار، قىلمىستىق ىستەر مەن قۇقىقتىق ستاتيستيكاعا تالداۋ جاسالدى.

- سپورت سالاسىنداعى پريەۆەنتيۆتىك شارالار ناتيجەسىندە «اقتوبە» فۋتبول كلۋبىنىڭ بۇرىنعى باسقارما ءتوراعاسى جامانتايەۆقا 40 ميلليون تەڭگە سوماسىنداعى زاڭسىز سىيلىق اقى بەرۋ فاكتىسى انىقتالدى. ول كلۋبتا قىزمەت اتقارعان ۋاقىتىندا ديرەكتورلار كەڭەسىنىڭ كەلىسىمىنسىز دەمەۋشىلىك قاراجات ەسەبىنەن وزىنە 40 ميلليون 400 مىڭ تەڭگە اۋدارعان. وبلىس اكىمدىگى سوتتىڭ ماجبۇرلەۋ تارتىبىمەن اتالعان سومانى جامانتايەۆتان كەرى ءوندىرىپ الدى. سونداي-اق، بۇل قاراجاتتى وڭىردەگى بالالار فۋتبولىن دامىتۋعا باعىتتاۋ ۇسىنىلدى، - دەدى ق ر سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ باسشىسى ەسقالي سالاماتوۆ.

ونىڭ ايتۋىنشا، جەمقورلىق دەرەكتەرى اقتوبە وبلىستىق دەنە شىنىقتىرۋ جانە سپورت باسقارماسىنا قاراستى مەكەمەلەردە دە انىقتالدى.

- ۇلتتىق سپورت تۇرلەرى جونىندەگى مەكتەپتىڭ باس ەسەپشىسى 3,3 ميلليون تەڭگە سوماسىنداعى بيۋدجەت قاراجاتىن جىمقىرىپ، قىلمىستىق كودەكستىڭ 189 بابىنا سايكەس ءىس قوزعالعان بولاتىن. قازىرگى ۋاقىتتا قاراجات تولىعىمەن بيۋدجەتكە قايتارىلدى، ال جاۋاپتى تۇلعا 2 جىلعا باس بوستاندىعىن شەكتەۋ جازاسىنا كەسىلدى. سونىمەن بىرگە 10 ديرەكتور مەن باپكەر جالعان ديپلوممەن جۇمىس ىستەگەن. ولاردىڭ ءبارى جۇمىستان شىعارىلدى، - دەدى ەسقالي سالاماتوۆ.

ايتا كەتەيىك، اقتوبە وبلىسىندا بيىل ءبىلىم سالاسىندا 3 جەمقورلىق فاكتىسى تىركەلدى. ونىڭ ەكەۋى اۋداندىق ءبىلىم ءبولىمىنىڭ باسشىسى، تاعى بىرەۋى قالا مەكتەبىنىڭ ەسەپشىسى.

اۆتور

التىناي ساعىندىقوۆا