اقتوبەدە ۇشەم ومىرگە كەلدى

اقتوبە. KAZINFORM - اقتوبە قالاسىندا ۇشەم ومىرگە كەلدى. ولارعا اتا-اناسى احماد، يبراحيم جانە ابدىكارىم ەسىمدەرىن بەردى.

اقتوبە قالاسىنداعى پەريناتالدىق ورتالىقتا بۇگىن ۇشەمدەر ۇيىنە شىعارىلدى. احمەتوۆتەر وتباسىنداعى قۋانىشتى بولىسۋگە تۋعان-تۋىستارى مەن وبلىستىق دەنساۋلىق ساقتاۋ باسقارماسىنىڭ وكىلدەرى باردى. پەريناتالدىق ورتالىقتىڭ اقپاراتىنا سۇيەنسەك، ۇشەمدەردىڭ اناسى 32 جاستا. بۇعان دەيىن 4 قۇرساق كوتەرگەن. ءۇش قىز، ءبىر ۇلدى تاربيەلەپ وتىرعان وتباسى اقتوبە قالاسىنىڭ ەسەت باتىر تۇرعىن الابىندا تۇرادى.

- بوسانۋ ءبولىمىنىڭ مەڭگەرۋشىسى ابات كۋبيەۆ، اكۋشەر-گينەكولوگ نۇرلىبەك كارمانوۆ، مەدبيكەلەر باقىت بايماعانبەتوۆا، زارينا بيجدايەۆا، نەوناتولوگ ايدانا نۇرمۇحانوۆا، البينا شەگەنبايەۆا وتاعا قاتىستى. احمادتىڭ سالماعى 2655، يبراحيم 2255، ال ابدىكارىم 2355 گرام بولدى. بالا مەن انانىڭ دەنساۋلىعى جاقسى، - دەپ حابارلادى وبلىستىق پەريناتالدىق ورتالىقتىڭ باسپا ءسوز قىزمەتى.

قازىر ۇشەمنىڭ اناسى ءوزىن جاقسى سەزىنەدى. ول دارىگەرلەرگە العىسىن ءبىلدىردى.

- كەسىر تىلىگى وتاسى جاسالدى. دارىگەرلەرگە العىسىمدى بىلدىرگىم كەلەدى. ءارقايسىسى كومەكتەستى. ءبارى دە ءوز ءىسىنىڭ ماماندارى، زور قولداۋ كورسەتتى. ءوزىم تابيعي جولمەن جۇكتى بولىپ، ەستىگىندە قوبالجىدىم. ۇشەم بولادى دەپ ويلامادىق. بۇل ۇلى سىي. شەكسىز العىس ايتامىن. ءۇش ۇلىمدى قولىما الىپ، قۋاندىم، - دەدى جاس انا ايسانا احمەتوۆا. قازىرگى كەزدە وتباسىنىڭ ۇلكەن بالاسى 10 جاستا، كىشىسى 3 تە.

اقتوبە وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى اسحات بالىقوۆتىڭ ايتۋىنشا، 9 ايدا وڭىردە 16800 بالا ومىرگە كەلدى. ونىڭ 120 ى ەگىز، ۇشەۋى ۇشەم.

ەسكە سالساق، بيىل تامىزدا ومىرگە كەلگەن ۇشەمنىڭ اتا-اناسى بالالارعا حامزا، يبراھيم جانە احماد ەسىمدەرىن بەردى.