اقتوبەدە ءۇش ادامنىڭ ولىمىنە اكەلگەن جول اپاتى كەزىندە رۋلدە بولعان مۇعالىم سوتتالدى
اقتوبە. KAZINFORM - وقۋشىلاردى اۋداندىق وليمپياداعا جەتكىزبەك بولعان مۇعالىم 5 جىلعا باس بوستاندىعىنان ايىرىلدى. بۇگىن سوت پوليتسيا مەن ءبىلىم باسقارماسىنا جەكە قاۋلى شىعاردى.
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا جول-كولىك اپاتى كەزىندە رۋلدە بولعان مۇعالىم جاندوس شامشادينگە ۇكىم شىقتى.
«جاندوس شامشادين قىلمىستىق كودەكستىڭ 345-بابى 4-بولىگىمەن كىنالى دەپ تانىلىپ، وعان 7 جىل مەرزىمگە كولىك باسقارۋ قۇقعىنان ايىرا وتىرىپ، 5 جىل مەرزىمگە باس بوستاندىعىنان ايىرۋ جازاسى تاعايىندالسىن. ج. شامشادينگە جازا وتەۋ ورنى قىلمىستىق اتقارۋ جۇيەسىنىڭ قاۋىپسىزدىگى بارىنشا تومەن مەكەمەسى تاعايىندالسىن»، - دەدى سۋديا نۇرلان باقتىعاليەۆ.
سونىمەن بىرگە سۋديا قىزمەتتىك جاۋاپسىزدىق تانىتقان ىرعىز اۋداندىق پوليتسيا ءبولىمى مەن ىرعىز اۋدانى تەمىراستاۋ جالپى ءبىلىم بەرەتىن مەكتەپتىڭ جاۋاپتى قىزمەتكەرىنە قاتىستى شارا قولدانۋ جونىندە قاۋلى شىعاردى. قاۋلىعا جاۋاپتى اقتوبە وبلىستىق پ د باستىعى، اقتوبە وبلىستىق ءبىلىم باسقارماسىنىڭ باسشىسى بەرۋى ءتيىس.
ايتا كەتەيىك، سوت ۇكىمى كۇشىنە ەنگەن جوق. تاراپتار اپەللياتسيالىق شاعىم تۇسىرمەيدى.
ەسكە سالساق، جول-كولىك وقيعاسى بىلتىر جەلتوقسان ايىندا بولدى. وندا ەكى وقۋشى مەن ءبىر مۇعالىم كوز جۇمدى. رۋلدە سول مەكتەپتىڭ مۇعالىمى بولعان. سوت وتىرىسى باستالعان كەزدە جول-كولىك وقيعاسىنىڭ سالدارىنان ءبىر وقۋشىنىڭ باسى جۇلىنىپ قالعانى دا بەلگىلى بولدى.