اقتوبەدە 7 جاسار تەننيسشى شيراق قيمىلىمەن كوپتى ءتانتى ەتتى
اقتوبە. KAZINFORM - اقتوبەلىك تەننيسشى مەدينا اماندىقتىڭ تەننيس ويناعان ءساتى الەۋمەتتىك جەلىگە تاراپ، وقۋشى بىردەن تانىمال بولدى.
قۇرشاساي ورتا مەكتەبىندە ءبىلىم الاتىن كىشكەنتاي سپورتشى قازىرگى كەزدە اپتاسىنا التى كۇن جاتتىعىپ ءجۇر.
قۇرشاساي تۇرعىن الابىنداعى № 77 ورتا مەكتەپتىڭ 2-سىنىپ وقۋشىسىن دەنە شىنىقتىرۋ ءپانىنىڭ ءمۇعالىمى مۇحيت ابدىعاليەۆ جاتتىقتىرادى.
مەدينا اماندىق 5 جاسىنان باستاپ تەننيس ۇيىرمەسىنە قاتىسىپ ءجۇر.
قولعا راكەتكا ۇستاۋ، دوپتى قاعىپ الۋ، قارسىلاستىڭ وسال تۇسىن ءبىلىپ، ونى باسىپ وزۋ ەرەجەسىن شەبەر مەڭگەرگەن.
قيمىلى شيراق وقۋشى اپتاسىنا 6 كۇن جاتتىعىپ ءجۇر.
— مەدينانىڭ اتا-اناسى بالانىڭ سپورتقا بەيىم ەكەنىن ءبىلىپ، جاتتىعۋدان قالتىرمايدى. مەكتەپتە، سونىمەن بىرگە ءاربىر سەنبى سايىن قالالىق ۇستەل تەننيسى سپورت مەكتەبىندە جاتتىعادى. ەكى ۇيىرمەگە تولىق بارادى. قازىر شەبەرلىگى شىڭدالىپ، قالالىق قانا ەمەس، وبلىستىق جارىستارعا دا قاتىسىپ ءجۇر. 2009 -جىلعى جانە ودان كىشى جاستاعى سپورتشىلار اراسىندا وتكەن جارىسقا قاتىسىپ، فينالعا جەتتى. ءساۋىر ايىندا 2013 -جىلى تۋعان سپورتشىلار اراسىندا جارىس وتەدى. سوعان قاتىسىپ، باق سىنايدى. ول وڭ جاقتان ۇرۋ، سول جاقتان ۇرۋ، كەسۋ، دوپتى اينالدىرۋ تاسىلدەرىن جاقسى مەڭگەرگەن، - دەدى مۇحيت ابدىعاليەۆ.
مەدينا اماندىق - وقۋ وزاتى. سىنىپ جەتەكشىسى ءبيبىجامال قۇرمان ونىڭ ماتەماتيكادا ەسەپتى شاپشاڭ شىعاراتىنىن، قازاق ءتىلىن دە ءسۇيىپ وقيتىنىن ايتىپ بەردى.
تۇسكە دەيىن وقيتىن ول ساباققا ۇنەمى دايىندالىپ كەلەدى.
- مەديناعا ءبىرىنشى سىنىپتان باستاپ ساباق بەرەمىن. وتە تالانتتى بالا. ساباقتى وتە جاقسى وقيدى، تەننيسكە دە قاتىسادى. سۋرەت سالعاندى دا ۇناتادى. ول الداعى ۋاقىتتا ۇستەل تەننيسىنەن چەمپيون بولعىسى كەلەتىنىن ايتىپ وتىرادى. وزىمە كومەكشى، ءارى سىنىپ بەلسەندىسى، - دەدى ۇستازى.