اقتوبە وبلىسىندا تاسقىننان زارداپ شەككەن 504 وتباسى 369 مىڭ تەڭگەدەن ءبىرجولعى كومەك الدى

استانا. KAZINFORM - اقتوبە وبلىسىندا سۋ تاسقىنىنان زارداپ شەككەن 504 وتباسىنا 163 ميلليون تەڭگە الەۋمەتتىك تولەم بەرىلدى. بۇل تۋرالى اقتوبە وبلىسى اكىمىنىڭ ورىنباسارى اسىلبەك ەسەنبايەۆ ايتتى.

«قازىرگى ۋاقىتتا اقتوبە سۋ قويماسىنىڭ ناقتى تولۋ كولەمى - 240 ميلليون تەكشە مەتر نەمەسە 98 پايىز. بۇگىن تاڭەرتەڭگى ساعات 10:00 دە سۋدىڭ كەلۋى سەكۋندىنا 9,3 تەكشە مەتر بولدى. ال سۋدى اعىزۋ كولەمى - سەكۋندىنا 30 تەكشە مەتر. قارعالى سۋ قويماسىندا 269 ميلليون تەكشە مەتر سۋ بار نەمەسە 96 پايىزعا تولدى. كەلىپ جاتقان سۋ كولەمى - سەكۋندىنا 69 تەكشە مەتر، اعىزۋ كولەمى - سەكۋندىنا 30 تەكشە مەتر. سۋ قويمالارىنداعى احۋال تۇراقتى ءارى قاتەر جوق. دەگەنمەن، ىرعىز اۋدانىنداعى تورعاي وزەنى باقىلاۋدا تۇر. وزەن ارناسىنا نۇرا مەن مامىر ەلدى ەلدى مەكەندەرى تاقاۋ ورنالاسقان. بۇل وزەن باستاۋىن قوستاناي وبلىسىنان الادى. جەدەل شتاب دامبانى نىعايتۋ ءۇشىن ول جاققا قوسىمشا 8 تەحنيكا جانە 3 مىڭ قۇم سالاتىن قاپ جىبەرۋ تۋرالى شەشىم قابىلدادى»، - دەدى ول ورتالىق كوممۋنيكاتسيالار قىزمەتىندگى بريفينگتە.

اكىم ورىنباسارىنىڭ دەرەگىنشە، ءبىرجولعى الەۋمەتتىك تولەمگە قاتىستى 1026 قۇجات قابىلداندى.

ونىڭ ىشىندە 504 وتباسىنا 163 ميلليون تەڭگە كولەمىندە ءبىرجولعى الەۋمەتتىك تولەم بەرىلدى.

قالعان 522 وتباسىنىڭ قۇجاتتارى قارالىپ جاتىر. بۇل باعىتتاعى جۇمىس جالعاسادى.

«سۋ تاسقىنىنان زارداپ شەككەندەردىڭ تۇرعىن ۇيلەرىن باعالاۋ جۇمىستارىنىڭ باستاپقى قورىتىندىلارى الىنۋدا. وسىعان وراي، اۋدانداردا تۇرعىندارعا تولەمدەر جاساۋ جۇمىستارى باستالدى»، - دەدى اسىلبەك ەسەنبايەۆ.