اقتوبە وبلىسىندا ەندى جۇك پەن ادامداردى پونتون كوپىر ارقىلى تاسىمالدايدى
اقتوبە. KAZINFORM - اقتوبە وبلىسى ويىل اۋدانىنىڭ ورتالىعىندا ەندى جۇك پەن ادامداردى پونتون كوپىر ارقىلى تاسىمالدايدى. بۇعان دەيىن تەك اسكەري وقۋ- جاتتىعۋدا پايدالانعان جىلجىمالى كوپىر بىرنەشە اي ويىل حالقىن وبلىس ورتالىعى، اۋىلدارمەن بايلانىستىرادى.
اقتوبە وبلىسى ويىل اۋدانىنا پونتون كوپىردى قورعانىس مينيسترلىگى بەردى. ەلىمىزدىڭ توتەنشە جاعدايلار مينيسترلىگى 16 مىڭ حالقى بار اۋداننىڭ قاتىناسى كۇرت ۇزىلگەندە ۇسىنىس ايتىپ، 50 ساعاتتا تەحنيكا مەن اسكەريلەر اقتوبەگە جەتتى.
«ويىلدا 16 مىڭ ادام تۇرادى. ال مۇنداعى كوپىردى سۋ شايدى. حالىقتىڭ قاتىناسى قيىندىق تۋدىردى. ت ج م قورعانىس مينيستردىگىنە پونتون كوپىر بار ەكەنىن ايتىپ، كومەك سۇرادى. ولار قولداپ، اقتوبەگە جىبەردى. جۇك 50 ساعاتتا جەتتى. «قازاقستان تەمىر جولى» ۇ ك 10 پلاتفورما، ءبىر ۆاگون بەردى. جول جوندەلگەنشە، كوپىر قالپىنا كەلگەنشە پونتون كوپىر وسىندا بولادى. مۇنداي شەشىم ەلىمىزدە ءبىرىنشى رەت قابىلدانعان. قورعانىس مينيسترلىگىنە راقمەت ايتقىم كەلەدى. پونتون كوپىر بىرنەشە جەڭىل كولىكتى تاسىمالداي الادى. ساعات سايىن جۇرەدى. بىرىندە تاق، بىرىندە جۇپ»، - دەدى ق ر ت ج ۆيتسە-ءمينيسترى سەرىك تولەنبەرگەنوۆ.
پونتون كوپىر ەلىمىز بويىنشا 58012 اسكەري بولىمىندە عانا بار. بۇعان دەيىن تەك اسكەري وقۋ- جاتتىعۋدا قولدانىلدى.
«3-ءساۋىر كۇنى پونتوندىق كوپىر باتالونىنىڭ جەكە قۇرامى جەدەل جۇمىلدىرىلدى. سۋ تاسقىنىنان زارداپ شەككەن ويىل اۋدانىنا كەلدىك. قازىر ويىل وزەنىندە 60 توننالىق پونتوندىق كوپىر بار. گۋمانيتارلىق كومەك، جەكە قۇرامدى تاسىمالداۋعا كەرەك. ءبىز 2 كۇندە كەلدىك. 15 قىزمەتكەر، 8 اسكەري تەحنيكا بار. ءار جىلدارى ءارتۇرلى وقۋ-جاتتىعۋدا پايدالاندىق. پونتوندىق كوپىر قازاقستان بويىنشا 58012 اسكەري بولىمىندە عانا بار. بۇل جولى حالىققا كومەك كورسەتۋ ءۇشىن اقتوبە وبلىسىنا اكەلىپ تۇرمىز»، - دەدى 58012 اسكەري ءبولىم كومانديرىنىڭ تەحنيكالىق جونىندە ورىنباسارى تۇياقبايەۆ.
اقتوبە وبلىسى ويىل اۋدانىنىڭ ورتالىعى قازىر سۋ قورشاۋىندا تۇر. وبلىس ورتالىعىنا قاتىنايتىن جولدى سۋ شايعان، كوپىر اپاتتى كۇيگە تۇسكەن.
«ءبىز وسى جىلجىمالى كوپىردى جول سالىپ بولعانشا پايدالانامىز. وسىلايشا قاتىناستى قامتاماسىز ەتە الامىز. سەبەبى اۋدانعا كىرەبەرىس جولدىڭ 350 مەترىن شايىپ كەتكەن. ەندىگى مىندەت - سول جولدى جوندەۋ. سونىمەن بىرگە كىرەبەرىستە 300 مەتر كوپىر بار. كوپىر دە اپاتتى جاعدايدا تۇر. ونى قاراۋعا جوبالىق ينستيتۋت قىزمەتكەرلەرى كەلدى. تەحنيكالىق قورىتىندى العان سوڭ قۇجاتتاما جاسالادى. سۋ تاسقىنى كەزىندە 300 مەتر كوپىردىڭ ەكى تىرەۋى سىر بەرگەن. بۇگىندە ءبىر بولىگى پايداعا اسپاي قالدى. تەحنيكالىق جاعدايى تۋرالى قورىتىندى العان سوڭ كوپىردى تۇگەل قايتا سالاتىنىمىز نەمەسە جالعايتىنىمىز بەلگىلى بولادى»، - دەدى اقتوبە وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايبەك قايىر.
ەسكە سالساق، ويىلدا بيىل 24-ناۋرىزدا جەرگىلىكتى دەڭگەيدە توتەنشە جاعداي جاريالاندى.
اۆتور
التىناي ساعىندىقوۆا