اقتوبە قالاسىندا بيىل 470 ينتەرنەت الاياقتىق دەرەگى تىركەلدى

اقتوبە. KAZINFORM - اقتوبە قالاسىندا 470 الاياقتىق دەرەگى تىركەلسە، كوبىنە ايەلدەر سان سوعىپ قالعان. تەرگەۋ كەزىندە 61 قىلمىستىق ءىس اشىلدى.

اقتوبە قالالىق پ ب تەرگەۋ ءبولىمىنىڭ باستىعى گالينا ستىرليچۋك ينتەرنەت الاياقتىعى دەرەگى ازايعانىن حابارلادى. دەگەنمەن قالا بويىنشا 470 قىلمىستىق قۇقىقبۇزۋشىلىق تىركەلدى. قازىرگى كەزدە 61 قىلمىستىق ءىس اشىلدى.

- ينتەرنەت الاياقتارىنا كوبىنە ايەلدەر الدانادى. قالادا 382 ايەل جابىرلەنۋشى تىركەلدى. ونىڭ ىشىندە جۇمىس ىستەمەيتىنى، زەينەتكەرى دە بار. ءتۇرلى تاۋار ساتۋ-ساتىپ الۋ، كولىك ساتۋ-ساتىپ الۋ سايتتارىمەن بىرگە الەۋمەتتىك جەلىدە دە كوپ الدانادى. ادامدار ساتۋشىنىڭ كىم ەكەنىنە ءمان بەرمەي-اق ساتىپ الۋعا اسىعادى، اقشاسىن اۋدارا سالادى. سودان كەيىن بىزگە كەلىپ، ارىز جازادى. جابىرلەنىشى سول كۇنى-اق ارىز جازۋى ءتيىس. ەرتە ايتسا، ءبىز دە تەز انىقتاي الامىز. كەيدە ەسەپشوت ءنومىرىن ايتىپ، بانككە حابارلاسىپ، اقشانى بۇعاتتاپ قويامىز،- دەدى گالينا ستىرليچۋك.

ونىڭ ايتۋىنشا، قازىر بەلگىلى ءبىر مەكەمە باسشىسىنىڭ نومىرىنەن حابارلاما جازىپ، ۇ ق ك قىزمەتكەرلەرى حابارلاساتىنىن، قاجەتتى اقپاراتتى دەر كەزىندە بەرۋ كەرەك ەكەنىن ايتادى. سول كەزدە جابىرلەنۋشى باسشىسىنا حابارلاسپايدى، كەرىسىنشە ىلە- شالا تەلەفون شالعان ادامعا قۇپيا مالىمەتتەردى بەرەدى.

- الاياقتار اقپارات العان بويدا نەسيە راسىمدەپ جىبەرەدى. كەيبىرى ەسەپشوتىنداعى بار اقشاسىنان ايىرىلادى. مۇنداي 13 دەرەك تىركەلدى،- دەدى اقتوبە قالالىق پ ب تەرگەۋ ءبولىمىنىڭ باستىعى.

ايتا كەتەيىك، بيىل 4 قالا تۇرعىنى الاياقتاردان 3 ميلليون تەڭگە اقشاسىن قايتارىپ الدى.

ەسكە سالساق، بىلتىر وڭىردە مىڭنان استام ينتەرنەت الاياقتىعى دەرەگى تىركەلدى.