اقتوبەدە كاسىپكەردى ولتىرگەن كۇدىكتى ۇستالدى

اقتوبە. KAZINFORM - اقتوبەدە جانار-جاعارماي جەلىسىنىڭ ديرەكتورى ايبولات جيسوۆتى ءولتىردى دەگەن كۇدىكپەن قالا تۇرعىنى ۇستالدى. قازىر تەرگەۋ جالعاسىپ جاتىر.

Фото: Солтан Жексенбеков/Kazinform

پوليتسيا قىلمىستىق كودەكستىڭ «ادام ءولتىرۋ» بابى بويىنشا ءىس قوزعادى.

- جەدەل-ىزدەستىرۋ ءىس-شارالارى كەزىندە پوليتسيا قىزمەتكەرلەرى كاسىپكەردى ءولتىردى دەگەن كۇدىكتىنى انىقتاپ، ۇستادى. ول قازاقستان رەسپۋبليكاسىنىڭ ازاماتى، اقتوبە قالاسىنىڭ تۇرعىنى بولىپ شىقتى. قىلمىستى اشۋ ماقساتىندا اقتوبەگە ءى ءى م ورتالىق اپپاراتىنىڭ تاجىريبەلى جەدەل قىزمەتكەرلەرى جىبەرىلدى. كۇدىكتى ۋاقىتشا ۇستاۋ يزولياتورىنا قامالدى. قازىرگى ۋاقىتتا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. تەرگەۋ بارىسى ءى ءى م باقىلاۋىندا، - دەپ حابارلادى اقتوبە وبلىستىق پوليتسيا دەپارتامەنتىنىڭ باسپا ءسوز قىزمەتى.

ەسكە سالساق، 16-قاراشا كۇنى تاڭدا 49 جاستاعى كاسىپكەردى ۇيىندە اتىپ كەتتى. ول وقيعا ورنىندا كوز جۇمدى.

كۇدىكتى بەتپەردە كيىپ، كەيىن قاشىپ كەتكەن.

بۇگىن مارقۇم ايبولات جيسوۆتى جەرلەۋ ءراسىمى ءوتتى.