اقتوبە قالالىق سوتىندا م. ءىزباساروۆا، ا. قادراليەۆا، ب. وتەبايەۆا جانە ا. تاكەنوۆاعا قاتىستى قىلمىستىق ءىس قارالدى. ولارعا قىلمىستىق كودەكستىڭ «الاياقتىق» بابى بويىنشا ايىپ تاعىلدى. سوتتالۋشىلاردىڭ ءبارى دە بۇعان دەيىن الاياقتىعى ءۇشىن سوتتالعان، راقىمشىلىققا ىلىگىپ، جازاسىنىڭ ءبىر بولىگى قىسقارتىلعان. سونىمەن بىرگە كامەلەت جاسقا تولماعان بالالارى بولعان سوڭ جازاسىن وتەۋ مەرزىمى 3 جىلعا كەيىنگە شەگەرىلگەن.
ءىس ماتەريالىنا سۇيەنسەك، سوتتالۋشىلار «Samruk-Kazyna Construction» ا ق-ى ارقىلى پاتەر الۋعا كومەكتەسەتىنىن ايتادى. ول قىزمەتى ءۇشىن كەيبىرىنەن 400000 تەڭگە السا، كەيبىرىنىڭ شىعىنى 14000000 تەڭگەدەن استى. وسىلايشا 59 اقتوبەلىك 160 ميلليون تەڭگە اقشاسىنان ايىرىلدى.
سوت ۇكىمىمەن سوتتالۋشى م. ءىزباساروۆا، ا. قادراليەۆا، ب. وتەبايەۆا جانە ا. تاكەنوۆا قىلمىستىق كودەكستىڭ «الاياقتىق» بابى بويىنشا ايىپتى دەپ تانىلىپ، 4 جىل 8 ايعا باس بوستاندىعىنان ايىرىلدى. سۋديا «راقىمشىلىق تۋرالى» زاڭىنا سۇيەنىپ جازا مەرزىمىن 3 جىل 6 ايعا قىسقارتتى. قىلمىستىق كودەكستىڭ 74-بابىنا 1-بولىگىنە سايكەس سوتتالۋشى م. ءىزباساروۆا، ا. قادراليەۆانىڭ جازانى وتەۋ مەرزىمى 3 جىلعا كەيىنگە شەگەرىلدى. ال ا. تاكەنوۆا جازاسىن 2 جىلدان كەيىن وتەيدى. سوت كامەلەت جاسقا تولماعان بالالارى بار ەكەنىن، سوندىقتان جازا وتەۋ مەرزىمى كەيىنگى شەگەرىلەتىنىن ايتتى. سوتتالۋشى ب. وتەبايەۆا سوت زالىنان قاماۋعا الىندى.
جابىرلەنۋشىلەردىڭ ازاماتتىق تالاپ ارىزى ءىشىنارا قاناعاتتاندىرىلدى. سوت ۇكىمى زاڭدى كۇشىنە ەنگەن سوڭ سوتتالۋشىلار جابىرلەنۋشىلەردىڭ اقشاسىن قايتارۋى ءتيىس.
ايتا كەتەيىك، استانا قالاسىنىڭ قىلمىستىق ىستەر جونىندەگى اۋدانارالىق سوتى زاماناۋي تەلەكوممۋنيكاتسيالىق تەحنولوگيالاردى پايدالانىپ، الاياقتىق قوڭىراۋلار ۇيىمداستىرعان ترانسۇلتتىق قىلمىستىق توپتىڭ 24 مۇشەسىن كىنالى دەپ تانىدى. سوت ءارقايسىسىنا 8 جىلعا باس بوستاندىعىنان ايىرۋ جازاسىن تاعايىندادى.