«اقتوبە» ارنايى ەكونوميكالىق ايماعىندا قولعا الىناتىن كاسىپ تۇرلەرى بەلگىلى بولدى

اقتوبە. KAZINFORM - «اقتوبە» ارنايى ەكونوميكالىق ايماعى قۇرىلىپ، وندا 38 كاسىپ ءتۇرى قولعا الىنادى. قۇجات اشىق ن ق ا پورتالىنا جاريالانىپ، تالقىلاۋعا شىعارىلدى.

اشىق ن ق ا پورتالىندا ارنايى ەكونوميكالىق ايماقتاعى قىزمەتتەردىڭ باسىم باعىتتارى كورسەتىلگەن. وندا توقىما ماتەريالدارىن، كيىمدەر ءوندىرۋ، ءتۇرلى قۇرىلىس ماتەريالدارىن جانە ەلەكتروندىق تەحنيكا شىعارۋ باعىتى بار. سونىمەن بىرگە ۇشاق، اۆتوموبيل جانە موتوسيكل قوزعالتقىشتارىنان باسقا قوزعالتقىشتار مەن تۋربينالاردى، گيدراۆليكالىق جانە پنيەۆماتيكالىق جابدىقتاردى، اۆتوموبيلدەرگە ارنالعان ەلەكتروندىق جابدىقتاردى ءوندىرۋ قىزمەتى تىزىمگە ەنگەن. اۋە جانە عارىشتىق ۇشۋ اپپاراتتارىن جوندەۋ جانە تەحنيكالىق قىزمەت كورسەتۋ، جۇك اۋە كولىگىنىڭ قىزمەتى، جۇك ساقتاۋ جانە قويمالاۋ، قۇرلىق كولىگىنىڭ كومەكشى قىزمەتى سەكىلدى بىرنەشە سالا قامتىلعان. «ارنايى ەكونوميكالىق ايماقتار اۋماعىندا جۇزەگە اسىرىلاتىن قىزمەتتىڭ باسىم تۇرلەرىنىڭ تىزبەسىن جانە ارنايى ەكونوميكالىق ايماقتار بولىنىسىندە قىزمەتتىڭ باسىم تۇرلەرىنىڭ تىزبەسىن جۇرگىزۋ قاعيدالارىن بەكىتۋ تۋرالى» بۇيرىق 5 -ناۋرىزعا دەيىن تالقىلاۋدا بولادى.

بۇعان دەيىن اقتوبە حالىقارالىق اۋەجايىنىڭ جانىنان 858 گەكتار جەر ارنايى ەكونوميكالىق ايماققا بەرىلەتىنى بەلگىلى بولدى. سونىمەن بىرگە ونەركاسىپ جانە قۇرىلىس مينيسترلىگى اقتوبە ارنايى ەكونوميكالىق ايماعىن قۇرۋ تۋرالى ۇكىمەت قاۋلىسىنىڭ جوباسىن جاريالادى.

اۆتور

التىناي ساعىندىقوۆا