اقتوبە اكىمى قارعالى وزەنى ماڭىنداعى تۇرعىندارعا ەسكەرتۋ جاساپ، ۇيىنەن شىعۋدى سۇرادى

اقتوبە. KAZINFORM - اقتوبە قالاسىنىڭ اكىمى ازامات بەكەت قارعالى وزەنىنىڭ دەڭگەيى كوتەرىلۋىنە بايلانىستى وزەن بويىنداعى ءبىرقاتار باۋ-باقشا ۇجىمدارىنا ءقاۋىپ ءتونىپ تۇرعانىن جەتكىزدى. بۇل تۋرالى وبلىس اكىمدىگىنىڭ باسپا ءسوز قىزمەتى ءمالىم ەتتى.

اكىم تۇرعىنداردان ەۆاكۋاتسياعا دايىن بولىپ، ۇيلەرىنەن شىعۋدى سۇرادى.

«سۋ وزەن ارناسىنان اسىپ، قارعالى الابىنا جاقىن ورنالاسقان سەيسميك، نەفتيانيك، ەكو، سولنىشكو، گاۋھار سياقتى بىرنەشە باۋ-باقشا ۇجىمدارىنا جايىلىپ كەلەدى. بۇل جەرلەردە قازىر جاعالاۋدى توپىراقپەن بەكىتۋ جۇمىستارى ءجۇرىپ جاتىر. ءبىراق وزەن تاسيتىن بولسا، مۇنىڭ ءوزى جەتكىلىكسىز. ءارى ەرتەڭ نوسەر جاۋىن كۇتىلۋدە. بۇل قازىرگى جاعدايدى قيىنداتا تۇسەتىنى انىق. سوندىقتان تۇرعىنداردان ەۆاكۋاتسياعا كەلىسىم بەرىپ، ۇيلەرىڭىزدى الدىن الا تاستاپ شىعۋدى سۇرايمىن»، - دەدى ازامات بەكەت.

«قازسۋشار» ر م ك اقتوبە وبلىستىق فيليالى ديرەكتورىنىڭ ورىنباسارى ءادىلجان ءالىزاق تا قارعالى سۋ قويماسىنداعى قازىر جاعداي تۋرالى باياندادى. ونىڭ ايتۋىنشا، وزەن � تولعان.

«قارعالى سۋ توعانىندا � عا سۋ جينالىپ تۇر. ەكسپلۋاتاتسيا بويىنشا 350 تەكشە مەتر سۋدى جىبەرىپ جاتىرمىز. قارعالى وزەنىنىڭ دەڭگەيى كوتەرىلۋى مۇمكىن. ءدال قازىرگى ساتتە اۋا رايى قۇبىلىپ، جاڭبىر جاۋۋىنا بايلانىستى سۋ قويماسى قوسىمشا اشىلادى. ول وزەن سۋىنىڭ دەڭگەيى ارناسىنان اسۋىنا اكەلەدى دەگەن بولجام بار»، - دەدى ول.

اقتوبە وبلىسى ت ج دەپارتامەنتىنىڭ ت ج الدىن الۋ ءبولىمىنىڭ باستىعى تاراس كوۆالەنكو ەلەك جانە قارعالى وزەندەرى ماڭىنداعى جاعداي تۋرالى جەتكىزدى.

«قۇرمەتتى، ەلەك جانە قارعالى وزەندەرىنىڭ ماڭىندا تۇراتىن اقتوبە قالاسىنىڭ تۇرعىندارى! تەمپەراتۋرانىڭ جوعارى بولۋىنا، سونداي-اق جاۋىن-شاشىننىڭ كوپ تۇسۋىنە بايلانىستى سۋ دەڭگەيىنىڭ كوتەرىلۋى بايقالىپ وتىر. اعىننىڭ قارقىنى ۇدەگەن جاعدايدا سۋ قويمالارىنان سۋ اعىزۋ كولەمى ۇلعايۋى مۇمكىن. قازىرگى ۋاقىتتا ولار شتاتتىق رەجيمدە، قوردى از-ازدان تولتىرۋ ءۇشىن جۇمىس ىستەپ جاتىر. جاعداي كۇردەلى ەكەنىن، سۋ تاسقىنى اياقتالماعانىن ءتۇسىنۋ قاجەت. سولتۇستىك بولىكتە قار قورىنىڭ قالدىقتارى بار، ولار اعىنداردىڭ ەرۋى جانە ۇلعايۋىنا اكەلەدى. سوندىقتان ەۆاكۋاتسيا جۇرگىزىلگەن جەرلەرگە ورالۋ قاۋىپسىز ەمەس. سۋ تەز كەلۋى مۇمكىن. توتەنشە جاعدايدا 101، 112، 109 نومىرلەرىنە قوڭىراۋ شالۋ سۇرالادى»، - دەپ حابارلادى تاراس كوۆالەنكو.