اقتاۋلىق تۇرعىن انتاركتيداعا ساياحات جاسادى
اقتاۋ. KAZINFORM - اقتاۋ قالاسىنىڭ تۇرعىنى رۋسلان چۋروۆ بالا كۇنگى ارمانىنا قول جەتكىزىپ، جەردىڭ ەڭ سۋىق كونتينەنتىنە ساياحات جاساپ كەلدى. 10 كۇن بويى انتاركتيدا بولعان ساياحاتشى اسەرىمەن ءبولىستى.
- انتاركتيدانى، ونداعى پينگۆيندەردى تابيعي ورتاسىندا كورۋ مەن ءۇشىن ارمان ەدى. ءبىراق تاعدىر كۇتپەگەن سىي جاسادى. ويلاماعان جەردەن ۇسىنىس ءتۇسىپ، مەن بىردەن كەلىستىم، - دەيدى رۋسلان.
ساياحاتشىنىڭ ساپارى 20 كۇنگە سوزىلعان. ونىڭ 10 كۇنىن ارگەنتينادا، قالعانىن انتاركتيدا وتكىزگەن. رۋسلان مۇز قۇرساۋىنداعى ماتەريككە بارۋ ءۇشىن تىڭعىلىقتى دايىندالعانىن ايتادى. ءبىر- بىرىنە سايكەس ۇشاق رەيستەرىن تابۋدىڭ ءوزى وڭاي بولماپتى. ول الدىمەن انتاركتيدانىڭ قاقپاسى سانالاتىن ارگەنتينانىڭ ۋشۋايا قالاسىنا بارعان.
- قازاقستاننان ۋشۋاياعا ادەتتە ەكى- ءۇش كۇندە جەتۋگە بولادى. انتاركتيداعا كرۋيزدەر وسى ۋشۋايا قالاسى ارقىلى باستالادى. دەگەنمەن، مەن ارگەنتينامەن دە تانىسۋ ءۇشىن ساياحاتىمدى ۇزارتۋدى ءجون كوردىم، - دەيدى ساياحاتشى.
انتاركتيداعا ول زاماناۋي ءارى، جايلى «Magellan Explorer» مۇزجارعىشىمەن جەتكەن. ايتۋىنشا، كرۋيزدەرىنىڭ قۇنى 10 نان 16 مىڭ دوللارعا دەيىن، ال ۇشۋ جانە تۇرۋ شىعىندارى - شامامەن 1,5-2 ميلليون تەڭگە. ساياحاتشى مۇزدى ايماققا اياق باسقاندا ءوزىن شىتىرمان وقيعالى فيلمنىڭ كەيىپكەرىندەي سەزىنگەنىن ايتادى.
- مەن كارتالار تاۋسىلىپ، مۇزدىڭ سيقىرى باستالاتىن جەرگە باردىم. جەر بەتىنىڭ ءبىر شەتىنە جەتىپ، اياعىم مۇزعا تيگەندە ەرەكشە سەزىمدە بولدىم. تابيعاتتىڭ شەبەرلىگىنە قاتتى تاڭ قالدىم. ءبىر مەزگىلدە ءبارىن تاسپالاپ تا، ءۇنسىز تاڭدانىسپەن تۇرعىم دا كەلدى. بىلەسىز بە؟ ارماندار شىنىمەن ورىندالادى! - دەپ ول قۋانىشىمەن ءبولىستى.
رۋسلان چۋروۆ ساياحات بارىسىندا قۋانىشتى سەزىممەن قاتار، قورقىنىش بولعانىن دا جاسىرمادى. ويتكەنى، اينالادا قالىڭ مۇزدان باسقا ەشتەڭە جوق. ءبىراق، جۇپ-جۇبىمەن جۇرگەن سۇيكىمدى پينگۆيندەر، قايىقتان بىرنەشە مەتر جەردە جۇزگەن كيتتەر، پوليارلىق كۇن استىندا جارقىراعان مۇزدىقتار ۇمىتىلماس اسەر قالدىرعان.
- بۇل ءجاي عانا ادەمى ەمەس، باستاپقى قالپىندا تۇرعان جاراتىلىس. انتاركتيدانى جەردىڭ «سوڭعى شەكاراسى» دەپ اتايتىنىن ەندى ءتۇسىندىم. ونى باعىندىرۋ مۇمكىن ەمەس. قۇپياسىن عانا سەزىنەسىڭ جانە جۇرەكتە ماڭگى ءىز قالدىرادى، - دەيدى ساياحاتشى.