اقتاۋداعى اۋىز سۋ تاپشىلىعى قاشان شەشىلەدى

اقتاۋ. KAZINFORM - اقتاۋدا اۋىز سۋ تاپشىلىعى ءالى دە وزەكتى. جەرگىلىكتى بيلىك تاپشىلىق تەك جاز ايلارىندا دەگەنىمەن كۇزدىڭ ەكىنشى ايى بولسا دا، ءالى كۇنگە دەيىن اۋىز سۋدىڭ قىسىمى تومەن، سۋسىز وتىرعان تۇرعىندار بار.

- وسى 27-شاعىناۋداننىڭ 28، 39 جانە 40-ۇيلەرىندە سۋ ماسەلەسى وزەكتى. بىزدە قىسىم وتە تومەن. ءبىرىنشى، ەكىنشى، ءۇشىنشى قاباتتاردا سۋ بولۋى مۇمكىن، ال ودان جوعارى قاباتتاعى پاتەرلەرگە مۇلدەم سۋ كەلمەيدى، - دەيدى اقتاۋ قالاسىنىڭ تۇرعىنى بولاتباي اتاشيەۆ.

اتقامىنەرلەر قالادا اۋىز سۋ تاپشىلىعىن جويۋ ءۇشىن تامىز ايىنىڭ سوڭىنا دەيىن ءبىرقاتار جوبا ىسكە قوسىلاتىنىن مالىمدەگەن بولاتىن. ءبىراق، كەيبىرىنىڭ اياقتالۋ مەرزىمى كەيىنگە شەگەرىلگەن. ماسەلەن، كاسپي سۋ تۇشىتۋ زاۋىتىن كەڭەيتۋ جۇمىستارى ءالى اياقتالعان جوق.

بۇعان دەيىن 20 مىڭ تەكشە مەتر اۋىز سۋ ءوندىرىپ تۇرعان كاسىپورىننىڭ قۋاتى جوسپار بويىنشا 40 مىڭ تەكشە مەترگە جەتۋى قاجەت.

- جابدىقتار كەش جەتكىزىلدى. سوندىقتان جوبانى قاراشا ايىنىڭ سوڭىنا دەيىن ىسكە قوسۋدى جوسپارلاپ وتىرمىز. سول كەزدە زاۋىت تاۋلىگىنە 40 مىڭ تەكشە مەتر سۋ وندىرەتىن بولادى. قازىرگى تاڭدا جۇمىستىڭ 95 پايىزى اياقتالدى. جالپى كاسىپورىن مۇنايلى، قاراقيا اۋداندارى مەن اقتاۋ قالاسى اۋماعىنداعى جىلى جاعاجايدى اۋىز سۋمەن قامتيدى. الداعى ۋاقىتتا اقتاۋ قالاسىنا دا سۋ بەرەتىن بولامىز، - دەيدى زاۋىت ديرەكتورى سەرىك گۋسمان.

ماڭعىستاۋ وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسىنىڭ مالىمەتىنە سۇيەنسەك، ايماقتا اۋىز سۋعا قاتىستى احۋال ءالى دە كۇردەلى.

وبلىسقا ورتا ەسەپپەن تاۋلىگىنە 173000 شارشى مەتر سۋ قاجەت. قازىرگى تاڭدا اۋىز سۋ تاپشىلىعى تاۋلىگىنە 54000 شارشى مەتردى قۇراپ وتىر.

اۋىز سۋ تاپشىلىعىن كەزەڭ-كەزەڭىمەن شەشۋ ءۇشىن وڭىردە قۋاتى تاۋلىگىنە 140500 شارشى مەتر بولاتىن 9 سۋ تۇشىتۋ زاۋىتى مەن قوندىرعى قۇرىلىسى، 1 قوندىرعىنىڭ جوندەۋ جۇمىستارى جۇرگىزىلىپ جاتىر.

بۇعان دەيىن ايماق باسشىسى نۇرداۋلەت قيلىباي وڭىردە سۋ تۇشىتۋ زاۋىتىن سالۋعا نيەتتى 2 شەتەلدىك كومپانيانىڭ زەرتتەۋ جۇرگىزىپ جاتقانىن ايتقان بولاتىن.

ونىڭ ايتۋىنشا، ماڭعىستاۋ وبلىسىندا سۋ تۇشىتاتىن زاۋىت سالىپ بەرۋگە نيەتتى ينۆەستورلار كوپ. ءبىراق، ولاردىڭ ۇسىنىستارى اكىمدىككە ۇناپ وتىرعان جوق.

- سەبەبى، ولار «زاۋىت سالىپ بەرەمىز، ساتىپ الاسىزدار» دەيدى. ول بىزگە كەرەك ەمەس. ءبىز «زاۋىت سالىڭىزدار، مونوپولياعا قارسى مەملەكەتتىك ورگاندار ءتاريفىڭىزدى بەكىتىپ بەرەدى. سول باعامەن حالىققا ساتاسىزدار» دەيمىز. قازىر ەكى شەتەلدىك كومپانيا كەلىپ، زەرتتەۋ جۇرگىزىپ جاتىر، - دەدى ءوڭىر باسشىسى.

اكىم وسى جاز ايلارىندا وڭىردەگى سۋ تاپشىلىعى تاۋلىگىنە 77 مىڭ تەكشە مەترگە جەتكەنىن ايتادى. سوندىقتان تاۋلىگىنە 20 مىڭ تەكشە مەتر سۋ تۇشىتاتىن كاسپي سۋ تۇشىتۋ زاۋىتىنىڭ مۇمكىندىگى كەڭەيتىلىپ جاتىر.