اقتاۋدا ءبىر توپ جاس ءوسپىرىم 11-سىنىپ وقۋشىسىنا وق اتىپ، اۋىر جارالادى
اقتاۋ. KAZINFORM - وقيعا 17-شاعىن اۋداندا كوشەدە بولعان. زارداپ شەككەن بالانىڭ ايتۋىنشا، ول دوستارىمەن كينودان شىققان. جولدا ءبىر توپ جاس ءوسپىرىم ونىڭ دوسىنا تيىسكەن.
ولاردى اجىراتپاق بولعاندا، بىرەۋى پنيەۆماتيكالىق تاپانشامەن كوزىنە وق اتقان.
- ولاردىڭ ىشىمدىك ءىشىپ العانىن بايقادىم. بىزگە دورەكى سويلەپ، دوسىما ءتيىستى. سابىرعا شاقىرماق بولدىم. سول كەزدە ءبىر بالا تاپانشامەن اتىپ جىبەردى. وق سول كوزىمە ءتيدى. سودان بەرى كوزىم مۇلدە كورمەي قالدى. ۇشقىش بولامىن دەگەن ارمانىم كوككە ءۇشتى، - دەيدى جابىرلەنۋشى.
بۇزاقىلار ونىسىمەن قويماي، قان جوسا بولىپ جاتقان بالانىڭ باسىنان تەۋىپ، ۇرىپ تاستاعان.
جاس وسپىرىمگە بىرنەشە كۇردەلى وتا جاسالدى. الايدا، كوز جانارىن قالپىنا كەلتىرۋ مۇمكىن بولماپتى. اناسى مادينا رىسماعانبەتوۆا ۇلىنىڭ اۋىر پسيحولوگيالىق سوققى العانىن ايتادى. سوندىقتان ول قىلمىستىق ءىستىڭ ءادىل تەرگەلۋىن جانە كىنالىلەردىڭ قاتاڭ جازالانۋىن سۇرايدى.
- اۋرۋحانادا بالام قايتا-قايتا كوزىن سۇراي بەردى. «ماما، كوزىم قالاي؟» دەيدى. م ر ت- دا وق بارى انىقتالدى. سودان كەيىن ءبىز پوليتسياعا حابارلاستىق. ءبىراق ءالى كۇدىكتىلەرمەن كەزدەستىرمەدى. تاپانشامەن وق اتقاندار - 2007-جىلى تۋعان كوللەدج ستۋدەنتتەرى، - دەيدى جابىرلەنۋشىنىڭ اناسى.
ماڭعىستاۋ وبلىستىق پوليتسيا دەپارتامەنتىنىڭ حابارلاۋىنشا، قىلمىستىق ءىس ءبىرىنشى ق ر ق ك 99-بابى بويىنشا (ادام ولتىرۋگە وقتالۋ) تىركەلىپ، كەيىن ق ر ق ك 106-بابىنا - «قاساقانا اۋىر دەنە جاراقاتىن كەلتىرۋ» اۋىستىرىلعان. كامەلەت جاسىنا تولماعان كۇدىكتەگە بۇلتارتپاۋ شاراسى رەتىندە ەلدەن شىعۋعا تىيىم سالىنعان.
- قىلمىستىق ءىس ق ر ق ك 106-بابى بويىنشا تەرگەلىپ جاتىر. كامەلەتكە تولماعان كۇدىكتى انىقتالدى. قازىرگى تاڭدا سوتقا دەيىنگى تەرگەۋ امالدارى جالعاسىپ جاتىر، - دەدى ماڭعىستاۋ وبلىستىق پوليتسيا دەپارتامەنتىنىڭ باسپا ءسوز قىزمەتى.
بۇعان دەيىن، اقتاۋدا كولىك قاعىپ كەتكەن 2 جاس ءوسپىرىمنىڭ جاعدايى اۋىر ەكەنىن جازعان بولاتىنبىز.