اقتاۋدا «پاتريوتتىق تاكسي» ىسكە قوسىلدى
اقتاۋ. KAZINFORM - بۇگىننەن باستاپ قالادا ەرەكشە تاكسي قىزمەت كورسەتە باستادى. كولىك جۇرگىزۋشى تۇرعىنداردى دىتتەگەن جەرىنە تەگىن جەتكىزەدى.
سونداي - اق رامىزدەر، تاريحي تۇلعالار تۋرالى پاتريوتتىق سۇراقتارعا جاۋاپ بەرسە، سىيلىق بەرەدى.
اقتاۋ قالاسىنىڭ تۇرعىنى ءاليا يسايەۆا بۇل باستاماعا كوپتەن ازىرلەنىپ، بۇگىن مەرەكە كۇنى جۇزەگە اسىردى.
- ارنايى قازاقستان رەسپۋبليكاسىنىڭ رامىزدەرىن ناسيحاتتاۋ ماقساتىندا باستادىم. مەن قازاقپىن دەگەن ازاماتتىڭ بويىندا پاتريوتتىق سەزىمدى وياتىپ قانا قويماي، ۇلتقا، وتانعا دەگەن سۇيىسپەنشىلىگىن ارتتىرۋدى كوزدەيمىن، - دەيدى ول.
پاتريوتتىق تاكسي تۇرعىنداردىڭ قىزىعۋشىلىعىن وياتتى. العاشقى جولاۋشىلاردىڭ ءبىرى قازبەك مىرزاعۇلوۆ كولىكتى الىستان بايقاپ توقتاتقانىن ايتادى.
- ءوزىمىزدىڭ كوك تۋىمىزبەن كومكەرىلگەن كولىككە وتىرعىم كەلدى. مىنە، تەگىن جەتكىزىپ سالدى. ەلىمىزگە قاتىستى، ەلتاڭباعا قاتىستى سۇراقتار قويدى. شامام كەلگەنشە جاۋاپ بەرىپ، سىيلىق الدىم. كۇشتى كوڭىل- كۇيدە تۇرمىن. ەلىمىزدە وسىنداي جاستاردىڭ پاتريوتتىق سەزىمىن وياتاتىن باستامالار كوپ بولسا ەكەن، - دەيدى قالا تۇرعىنى.
پاتريوتتىق تاكسيدى بەزەندىرۋگە 1 ميلليون جارىم تەڭگە قاراجات جۇمسالعان. جوبانى ماڭعىستاۋ وبلىستىق اكىمدىگى قولداپ، قارجىلاندىرعان.
پاتريوتتىق تاكسي اپتاسىنا ءبىر رەت، كەشكى ساعات 17-00 دەن 20-00 گە دەيىنگى ارالىقتا قاتىنايدى. جوبانىڭ اياسىندا قالا كوشەلەرىنە مەملەكەتتىك تۋ ءىلىنىپ، قوعامدىق اۆتوبۋستار دا بەزەندىرىلگەن.