اقتاۋدا «ابىسىن-اجىن» سايىسى ءوتتى
اقتاۋ. KAZINFORM - سايىس رەسپۋبليكالىق دەڭگەيدە ۇيىمداستىرىلىپ، وعان ماڭعىستاۋ مەن اتىراۋ وبلىستارىنان 70 كە جۋىق ادام قاتىستى.
شارانىڭ ماقساتى - ءبىر وتباسىنداعى كەلىندەردىڭ ونەگەلى قارىم- قاتىناسىن كورسەتۋ، ۇرپاققا وتباسى بىرلىگىن، سالت-ءداستۇردى، ادەت-عۇرىپتى ناسيحاتتاۋ.
- ۇرپاقتار ساباقتاستىعىن ناسيحاتتاۋ كەرەك. جول كورسەتەتىن مىنا بىزدەر - انالارمىز. بۇل شاراعا كەلگەنىمە وتە قۋانىشتىمىن. كوپ وي ءتۇيىپ جاتىرمىز. بىلمەگەنىمىزدى ءبىلىپ جاتىرمىز. ۇلكەن بۋىننان ۇيرەنەرىمىز كوپ. كەيىنگى بۋىنعا بەرەرەمىز دە كوپ دەپ ەسەپتەيمىن، - دەيدى اتىراۋ وبلىسىنىڭ تۇرعىنى ارمانگۇل اسقاروۆا.
«ابىسىن-اجىن» بايقاۋى وبلىستا وسىمەن 4-رەت ءوتىپ وتىر. قاتىسۋشىلار الدىمەن امانداسىپ، ونەرىن، شەبەرلىگىن كورسەتتى. سودان سوڭ ادەت- عۇرىپقا بايلانىستى سۇراقتارعا جاۋاپ بەرىپ سىنعا ءتۇستى.
- ماڭعىستاۋ سالت-ءداستۇردىڭ قايماعى بۇزىلماعان ولكە. سول بۇگىنگى شارادا كورىنىس تاۋىپ جاتىر. ءبىز بايقاۋ ارقىلى تاتۋلىقتى تۋ ەتكەن، ءبىر ءۇيدىڭ، بۇكىل اۋلەتتىڭ ءتۇتىنىن تۇتەتىپ وتىرعان جاس كەلىندەردىڭ، جاس انالاردىڭ ءومىر سالتىن كورسەتە وتىرىپ، وتباسى تاتۋلىعىن ناسيحاتتايمىز، - دەيدى سايىستى ۇيىمداستىرۋشى، قوعام بەلسەندىسى بيبىگۇل رامازانوۆا.
بايقاۋدىڭ قورىتىندىسى بويىنشا باس جۇلدەگە ماڭعىستاۋ اۋدانىنان قاتىسقان بەكماعۇلوۆتار اۋلەتىنىڭ كەلىندەرى يە بولدى. جەڭىمپازدارعا 300 مىڭ تەڭگە بەرىلدى.
اۆتور
اياگوز ءىزباساروۆا