اقتاۋدا 67 جاستاعى تۇرعىننىڭ جۇرەگىنە ەرەكشە ادىسپەن وتا جاسالدى
ماڭعىستاۋ وبلىستىق كوپبەيىندى اۋرۋحاناسىندا جۇرەككە وپەراتسيانىڭ ەرەكشە ءتۇرى جاسالدى. ەندى كارديوحيرۋرگ-دارىگەرلەر جۇرەككە وتا جاساۋ ءۇشىن ءتوستى تەرەڭ تىلمەي-اق، قابىرعا ارالىق شاعىن كەسىندى ارقىلى اورتا- كورونارلى شۋنتتاۋ وپەراتسياسىن جاسايدى، دەپ حابارلايدى Kazinform.
كارديوحيرۋرگ- دارىگەر ءابۋناسىر سۋحانوۆتىڭ ايتۋىنشا، بۇعان دەيىن اورتا- كورونارلى شۋنتتاۋ وپەراتسياسى كلاسسيكالىق جولمەن جاسالدى. ياعني، وتا كەزىندە ناۋقاستىڭ ءتوسىن ارامەن 25 س م دەيىن كەسەتىن ەدى. ال قازىر وڭتايلى ءادىس ارقىلى ناۋقاسقا قاۋىپسىز ءارى جەڭىل تۇردە وتەتىن وپەراتسيانى ەنگىزگەن.
«67 جاستاعى اقتاۋلىق تۇرعىنعا قابىرعا اراسىنان 5-7 س م كەسىندى ارقىلى اورتا-كورونارلى شۋنتتاۋ وپەراتسياسى جاسالدى. ءۇش شۋنت جاسادىق، قازىرگى تاڭدا ناۋقاستىڭ جاعدايى جاقسى. ەركىن قوزعالىپ، قولىن اۋىرسىنۋسىز كوتەرە الادى. ەگەر ءبىز ءتوسىن كەسۋ ارقىلى وتا جاسايتىن بولساق، وندا ناۋقاس 6 اي بويى ارقاسىمەن جاتاتىن ەدى. ال قازىر ناۋقاس وتادان كەيىنگى ءۇشىنشى كۇنى وزدىگىنەن جۇرەدى»، - دەدى كارديوحيرۋرگ-دارىگەر ءابۋناسىر سۋحانوۆ.
سونىمەن قاتار اتالعان وتانىڭ تيىمدىلىگى - ءتوستىڭ اشىلۋ قاۋپى بولمايدى، وڭالتۋ كەزەڭى تەز جۇرەدى، تىلىك كولەمى از بولعاندىقتان ناۋقاس كوپ قان جوعالتپايدى.
«2022 -جىلى جۇرەگىم اۋىرىپ، وتا جاسالىپ، ءتورت رەت ستەند قويدىرعان ەدىم. ءبىر- ەكى جىلدان سوڭ قايتا جۇرەگىم اۋىرا باستادى. وبلىستىق اۋرۋحانادا جۇرەگىمە وتا جاساتۋعا شەشىم قابىلدادىم. قازىر جاعدايىم جاقسى، ەشقانداي اۋىرسىرۋ جوق. اۋرۋحانا دارىگەرلەرى مەن مەدبيكەلەرى دە جاقسى قاراپ جاتىر. اۋرۋحانا باسشىلىعىنا جانە ءابۋناسىر جەتپىس ۇلىنا العىسىم شەكسىز»، - دەدى ناۋقاس.