اقتاۋعا يراننان كەلەتىن تۋريستەردىڭ قاتارى ارتىپ وتىر
اقتاۋ. KAZINFORM - يران استاناسىنان اقتاۋعا قاتىنايتىن چارتەرلىك رەيسپەن كەزەكتى تۋريستەر ۇشىپ كەلدى.
ناۋرىز ايىنىڭ باسىنان بەرى ءوڭىردىڭ كورنەكتى جەرلەرىن ارالاۋعا نيەتتى يراندىقتاردىڭ ءۇشىنشى لەگى اقتاۋعا تابان تىرەدى. بىلتىر تۋريستىك ماۋسىم اشىلعان ۋاقىتتا يران يسلام رەسپۋبليكاسىنان ماڭعىستاۋعا قاتىناعان تۋريستەر لەگى كۇزگە دەيىن تولاستاماعان ەدى.
جالپى اقتاۋ قالاسىنا جىل باسىنان بەرى شەتەلدەردەن 14 مىڭعا جۋىق تۋريست كەلگەن. ال پارسى ەلىنەن كەلگەن ساياحاتشىلار 10 كۇن اياسىندا وبلىستىڭ بىرنەشە جەرىنە بارۋدى كوزدەپ وتىر. اقتاۋ قالالىق كاسىپكەرلىك جانە اۋىل شارۋاشىلىعى ءبولىمى باسشىسىنىڭ ورىنباسارى وسپان نىساننىڭ ايتۋىنشا، اقتاۋعا تۋريستەردىڭ باسىم بولىگى شەتەلدەن كەلگەن كورىنەدى.
«اقتاۋ قالاسىنىڭ تۋريستىك الەۋەتىن ارتتىرۋ باعىتىندا ءبىرقاتار جۇمىستار جاسالىپ جاتىر. اقتاۋعا تەگەراننان 112 جولاۋشى چارتەرلىك رەيسپەن ۇشىپ كەلدى. نەگىزىنەن تۋريستەردىڭ باسىم بولىگى يران، سونىمەن قاتار، يتاليا، رەسەي جانە فرانسيا ەلدەرىنەن قىزىعۋشىلىق تانىتۋدا»، - دەدى وسپان نىسان.
بۇعان دەيىن ناۋرىز مەرەكەسى قارساڭىندا اقتاۋعا تەگەراننان چارتەرلىك رەيسپەن تۋريستەر كەلگەن بولاتىن. بۇل رەتتە شەتەلدەن كەلەتىندەر وبلىستاعى ءتۋريزمنىڭ دامۋىنا ءوز سەپتىگىن تيگىزەتىنى ايتىلدى.