ماڭعىستاۋ وبلىستىق پروكۋراتۋراسىنىڭ حابارلاۋىنشا، پوليتسيا قىزمەتكەرلەرى ايەلگە قاتىستى اكىمشىلىك قۇقىق بۇزۋشىلىق تۋرالى حاتتاما تولتىرعان.
اتالعان قۇقىق بۇزۋشىلىق ءۇشىن اكىمشىلىك قۇقىق بۇزۋشىلىق تۋرالى كودەكستە 15 تاۋلىككە اكىمشىلىك قاماققا الۋ جانە 7 جىل مەرزىمگە كولىك قۇرالىن باسقارۋ قۇقىعىنان ايىرۋ جازاسى قاراستىرىلعان.
ءىستى قاراۋ بارىسىندا قۇقىق بۇزۋشى سوتقا جۇكتىلىك تۋرالى دارىگەردىڭ انىقتاماسىن ۇسىنعان. وسىعان بايلانىستى سوت ونى اكىمشىلىك قاماقتان بوساتىپ، 7 جىل مەرزىمگە كولىك قۇرالىن باسقارۋ قۇقىعىنان ايىرۋ تۇرىندەگى قوسىمشا جازانى عانا تاعايىنداعان.
اقتاۋ قالاسىنىڭ پروكۋراتۋراسى تەكسەرۋ بارىسىندا قۇقىق بۇزۋشى ۇسىنعان جۇكتىلىك تۋرالى انىقتامانىڭ جالعان ەكەندىگىن انىقتاعان.
پروكۋروردىڭ ءوتىنىشحاتى بويىنشا ماڭعىستاۋ وبلىستىق سوتى ءبىرىنشى ساتىداعى سوتتىڭ قاۋلىسىن وزگەرتىپ، قۇقىق بۇزۋشىعا 15 تاۋلىككە قاماققا الۋ جازاسىن تاعايىندادى.
مەديتسينالىق قۇجاتتى قولدان جاساۋ جانە ونى پايدالانۋ فاكتىلەرى بويىنشا مەديتسينا قىزمەتكەرى مەن قۇقىق بۇزۋشىعا قاتىستى قىلمىستىق كودەكستىڭ 385-بابىمەن قىلمىستىق ءىس قوزعالدى.
پروكۋراتۋرا كولىك قۇرالىن ماساڭ كۇيدە باسقارعانى ءۇشىن جاۋاپتىلىق تۋرالى ەسكەرتەدى جانە ازاماتتاردى زاڭ تالاپتارىن ساقتاۋعا شاقىرادى.