اقتاۋ تەڭىز پورتى كونتەينەرلەردى اۋىستىرىپ تيەۋ بويىنشا رەكوردتىق كورسەتكىشكە قول جەتكىزدى
اقتاۋ. KAZINFORM - بيىل مامىر ايىندا اقتاۋ تەڭىز پورتىندا كونتەينەرلەردى اۋىستىرىپ تيەۋ جۇمىستارى قارقىندى جۇرگىزىلدى.
ناتيجەسىندە 5,1 مىڭنان استام جيىرما فۋتتىق ەكۆيۆالەنتتى قۇرايتىن كونتەينەرلەر اۋىستىرىپ تيەلدى. ال، بىلتىر مامىردا بۇل كورسەتكىش 2,6 مىڭ جيىرما فۋتتىق ەكۆيۆالەنتتى قۇرادى. 5,1 مىڭ جيىرما فۋتتىق ەكۆيۆالەنت - پورت تاريحىنداعى رەكوردتىق كورسەتكىش.
كونتەينەرلىك تاسىمالدار اسىرەسە، قىتاي حالىق رەسپۋبليكاسىنان ەۋروپا ەلدەرىنە ترانسكاسپي حالىقارالىق كولىك باعىتى بويىنشا 2 ەسەگە وسكەن. جۇك تاسىمالداۋشىلاردىڭ باسىم بولىگى تاۋارلارىن ترانسكاسپي حالىقارالىق كولىك باعىتى بويىنشا قايتا باعىتتاعان.
- ياعني، قازىرگى تاڭدا اتالعان باعىتتىڭ الەۋەتى جوعارى. باستى ارتىقشىلىقتارى - جۇكتەردى جەتكىزۋ مەرزىمى مەن ونىڭ سۋەتس كانالىنا قاراعاندا ءجۇرىپ وتەتىن جولىنىڭ قاۋىپسىزدىگىندە، - دەيدى تەڭىز پورتىنىڭ باس ديسپەتچەرى ۆاديم نوۆيكوۆ.
جالپى بيىل پورتتا جىل باسىنان بەرى 15,8 مىڭنان استام جيىرما فۋتتىق ەكۆيۆالەنت كونتەينەر تيەلگەن. بۇل وتكەن جىلدىڭ وسى كەزەڭىمەن سالىستىرعاندا 50 پايىزعا ارتىق. كونتەينەرلەردىڭ باسىم بولىگى ترانسكاسپيي حالىقارالىق كولىك باعىتى بويىنشا تاسىمالداندى.
اقتاۋ تەڭىز پورتىندا كونتەينەرلىك جۇكتەردى اۋىستىرىپ تيەۋدى ودان ءارى دامىتۋ ءۇشىن، تامىز ايىندا ءبىرقاتار زاماناۋي تەحنيكالار ىسكە قوسىلادى. ولار جالپى جانە ءۇيىندى جۇكتەرگە ارنالعان جۇك كوتەرگىشتەر مەن پورتالدىق كراندار.