اقمولالىق زەينەتكەرگە فليۋروگرافيا پروتسەدۋراسى 9 ميلليون تەڭگەگە ءتۇستى

استانا. KAZINFORM - الاياقتار ازاماتتاردى الداۋدىڭ جاڭا ءادىسىن ويلاپ تاۋىپ، وعان ستەپنوگورسك قالاسىنىڭ 75 جاستاعى تۇرعىنى ءتۇسىپ قالدى.

وبلىستىق پوليتسيا دەپارتامەنتىنىڭ مالىمەتىنشە، بيىل تامىز ايىندا ءوزىن ەمحانا قىزمەتكەرىمىن دەپ تانىستىرعان بەلگىسىز بىرەۋ ستەپنوگورسك قالاسىنىڭ 75 جاستاعى تۇرعىنىنا حابارلاسقان.

- بەيتانىس ەر ادام زەينەتكەرگە كەۋدە قۋىسىنىڭ رەنتگەنىن ءتۇسىرۋ كەرەك ەكەنىن ايتىپ، ونى بەلگىلى ءبىر كۇنگە الدىن الا جازىپ قويا الاتىنىن ايتادى. بەيتانىس ادامعا سەنگەن اقمولالىق زەينەتكەر 1414 نومىرىنەن كەلگەن كودتى ايتقان»، - دەيدى دەپارتامەنتتەگىلەر.

وسىدان كەيىن زەينەتكەرگە باسقا نومىرلەردەن قوڭىراۋلار تۇسە باستاعان. ولار وزدەرىن «ەلەكتروندىق ۇكىمەت» قاۋىپسىزدىك قىزمەتىنىڭ وپەراتورلارى، ۇلتتىق بانك جانە قارجى پوليتسياسىنىڭ قىزمەتكەرلەرىمىز دەپ تانىستىرعان.

الاياقتار ەگدە ايەلدى شاتاستىرىپ، قورقىتقان. زەينەتكەر دەپوزيتتەگى بارلىق اقشاسىن سولاردىڭ شوتىنا اۋدارىپ بەرگەن.

- شىعىن 9 ميلليون تەڭگەدەن استى. الاياقتىق بابى بويىنشا قىلمىستىق ءىس قوزعالدى، تەرگەۋ ءجۇرىپ جاتىر»، - دەپ قوستى پوليتسيا.

ءتارتىپ ساقشىلارى ازاماتتاردى قىراعى بولۋعا جانە ەشقاشان بەيتانىس ادامدارعا SMS كودتارىن، جەكە مالىمەتتەرىن جانە بانك شوتى تۋرالى اقپاراتتى بەرمەۋگە شاقىردى.

ەسكە سالايىق، قوستانايدا تەلەفون نومىرلەرىن جالعا بەرىپ، الاياقتارعا كومەكتەسكەن جىگىت ۇستالدى.