اقمولادا ءىرى قارا مال تۇقىمدارى بايقاۋىنىڭ جەڭىمپازى انىقتالدى
استانا. KAZINFORM - قازاقستاندا ەتتى ءىرى قارا مال تۇقىمدارى اراسىندا ۇلتتىق كونكۋرستىڭ جەڭىمپازى انىقتالدى جانە وعان جارىستىڭ باس جۇلدەسى - جاڭا تراكتور تارتۋ ەتىلدى.
مالشىلار اراسىنداعى كونكۋرس «Jańa Dala / Green Day ‘2024» دالا كۇنى اياسىندا ءوتتى. حالىقارالىق قازىلار القاسىنىڭ شەشىمىمەن «Jańa Dala / Green Day ‘2024» «ەڭ كۇشتى بۇقا» نوميناتسياسىندا Qazaq Aqbas قازاقتىڭ اقباس تۇقىمىنىڭ رەسپۋبليكالىق تۇقىمىن كوپشىلىككە ۇسىنعان اباي وبلىسىنداعى «داۋرەن» شارۋا قوجالىعىنىڭ شومبال اتتى بۇقاسى جۇلدە يەگەرى بولدى. شومبالدىڭ سالماعى 598 ك گ، تۋعان كەزدەگى سالماعى 26 ك گ بولعان.
ابسوليۋتتىك چەمپيون اتانعان شومبال بۇقاسىن سول جەردە اۋكتسيوندا سولتۇستىك قازاقستان وبلىسى اقجار اۋدانى شارۋاشىلىقتارىنىڭ ءبىرى 1 ميلليون تەڭگەگە ساتىپ الدى.
سونىمەن بىرگە، اقمولا وبلىسىنىڭ «KazBeef» ج ش س شارۋاشىلىعىنان انگۋس قازاقستان تۇقىمىنان «Stevenson» اتتى بۇقا ۆيتسە- چەمپيون اتانىپ، 1-ورىن يەگەرى بولدى. گەرەفورد تۇقىمىنان قوستاناي وبلىسىنىڭ «ولجا ارىستان پ ك» شارۋاشىلىعىنان «ستيلنىي» اتتى بۇقا 2-ورىن يەلەندى. 3-ورىندى قازىلار القاسى اۋليەكول تۇقىمىنان قوستاناي وبلىسى موسكاليەۆسكوە ج ش س شارۋاشىلىعىنان «توپول» اتتى بۇقاعا بەردى.
كونكۋرسقا اۋليەكول تۇقىمىنىڭ، Qazaq Aqbas قازاقتىڭ اقباس تۇقىمىنىڭ، قازاقستاننىڭ انگۋس تۇقىمىنىڭ، گەرەفورد تۇقىمىنىڭ 56 بۇقاسى قاتىستى. كونكۋرس كورسەتىمىنە قالماق تۇقىمىنىڭ، سونداي-اق شارولە، ليمۋزين، وبراك تۇقىمدارىنىڭ بۇقالارى قاتىسقان.
جەڭىمپازداردى قازاقستاننان، يرلانديادان، شوتلانديادان جانە ا ق ش-تان كەلگەن قازىلار القاسىنىڭ بەدەلدى قۇرامى - جىلدار بويى ءىرى قارا مال وسىرۋمەن اينالىساتىن حالىقارالىق ساراپشىلار تاڭدادى.
سونداي-اق، «Jańa Dala / Green Day ‘2024» دالا كۇنىندە ەدىلباي تۇقىمىنىڭ ءار ءتۇرلى جىنىس- جاس توپتارىنىڭ اسىلتۇقىمدى قويلارى جانە پاۆلودار وبلىسىنىڭ «AGRO TAWA» ج ش س-نەن يمپورتتىق ەتتى دورپەر تۇقىمدارىنىڭ قوشقارلارى، اقمولا وبلىسىنىڭ «سۋلەيمەنوۆ ك» شق دورپەر، سۋففولك، شارولە قويلارى ۇسىنىلدى. اسىل تۇقىمدى قويلار كورمەسىنە اقمولا، سولتۇستىك قازاقستان، قاراعاندى جانە پاۆلودار وبلىسىنان شق قاتىستى. كورمە بارىسىندا ەدىلباي تۇقىمىنىڭ اسىل تۇقىمدى قويلارىنىڭ اۋكتسيونى، قوشقار كوتەرۋ، جىلىك سىندىرۋ سياقتى ۇلتتىق ويىندار ءوتتى. قوي شارۋاشىلىعىنا ارنالعان جابدىقتار مەن ۆەتەريناريالىق پرەپاراتتار، سونداي اق قويشى يتتەردىڭ جۇمىسى ۇسىنىلدى.
«Jańa Dala / Green Day» مامانداندىرىلعان كورسەتىم- كورمەسى - 2013 -جىلدان بەرى وتكىزىلىپ كەلە جاتقان ءداستۇرلى دالا كۇنى فورماتىنداعى ءىس-شارا. كورمە زاماناۋي اۋىل شارۋاشىلىعى تەحنولوگيالارىنىڭ، سەلەكتسيالىق جەتىستىكتەردىڭ، جوعارى ءونىمدى تەحنيكانىڭ، سونداي- اق مال شارۋاشىلىعى، ۆەتەريناريا، وسىمدىكتەردى قورعاۋ جانە ورگانيكالىق ەگىنشىلىك سالاسىنداعى يننوۆاتسيالىق ازىرلەمەلەردىڭ رەسپۋبليكاداعى ەڭ ءىرى كورسەتىم الاڭى سانالادى.
اۆتور
ايجان سەرىكجان قىزى