اقمولا وبلىسىندا سۋدا قالعان 6 تۇيە قۇتقارىلدى

كوكشەتاۋ. KAZINFORM - اقمولا وبلىسىندا سۋدا قالعان جانۋارلاردى قۇتقارۋ جۇمىستارى جالعاسۋدا، قوسشى قالاسىنىڭ تايتوبە اۋىلىندا 6 تۇيە قۇتقارىلدى.

اۋماقتىق ت ج د باسپا ءسوز قىزمەتىنىڭ مالىمەتىنشە، تۇيەلەر قىزىل سۋ كەلگەندە دالادا جايىلىپ جۇرگەن. جانۋارلار سۋدان ۇركىپ، شوگىپ جاتىپ العان. تۇيەلەردى ت ج د باستىعىنىڭ ورىنباسارى ەرلان مولداحانوۆ باستاعان قۇتقارۋشىلار قۇرعاق جەرگە الىپ شىقتى.

«وتىز جىلدىق تاجىريبەمدە تۇيەلەردى العاش رەت قۇتقارىپ وتىرمىن. سۋدىڭ تەرەڭدىگى شامامەن ءبىر مەتر، جانۋارلار سۋدا جۇرە دە، جۇزە دە المايدى، شوگىپ جاتىپ الادى. ءبىز ولاردى بىردەن سۋى جوق، اشىق جەرگە شىعاردىق. بىردە-ءبىر تۇيە زارداپ شەككەن جوق»، - دەپ اتاپ ءوتتى ەرلان مولداحانوۆ.

ايتا كەتسەك، بۇدان بۇرىن كوكشەتاۋ قالاسىنداعى سۋ تاسقىنى جاعدايى تۇراقتالعانىن جازعان ەدىك.

اۆتور

اسلان وسپانوۆ