اقمولا وبلىسىندا جالعان قۇجاتپەن جۇرگەن جۇرگىزۋشى ۇستالدى

استانا. قازاقپارات - اقمولا وبلىسىندا پاترۋلدىك پوليتسيا قىزمەتكەرلەرى قازاقستاندىق ازاماتتى قىرعىز رەسپۋبليكاسىنىڭ اتىنا جاسالعان جالعان قۇجاتتارمەن ۇستادى، دەپ حابارلايدى Polisia.kz.

قازاقستاندىق ازامات كولىك باسقارۋ قۇقىعىنان ايىرىلعاندىقتان، زاڭدى اينالىپ ءوتىپ، كولىكتى ەش كەدەرگىسىز جۇرگىزۋ ماقساتىندا وسىنداي ايلاعا بارعان.

17-قازان كۇنى ەلورداعا قاراستى پاترۋلدىك پوليتسيا روتاسىنىڭ قىزمەتكەرلەرى استانا - قورعالجىن اۆتوجولىندا Mercedes-Benz اۆتوكولىگىن توقتاتتى. تەكسەرۋ بارىسىندا جۇرگىزۋشى ءوزىن قىرعىز رەسپۋبليكاسىنىڭ ازاماتى دەپ تانىستىرىپ، پوليتسياعا جەكە كۋالىك پەن جۇرگىزۋشى كۋالىگىن ۇسىندى.

الايدا، تەكسەرىس ناتيجەسىندە قۇجاتتاردىڭ جالعان ەكەنى انىقتالدى. پاترۋلدىك پوليتسيا قىزمەتكەرلەرى ونىڭ قازاقستان اۋماعىندا بولۋ ماقساتىنا جانە مەملەكەتتىك شەكارانى كەسىپ وتۋىنە بايلانىستى قوسىمشا سۇراقتار قويىپ، كوشى-قون قىزمەتىنىڭ مالىمەتتەر بازاسىنان مۇقيات تەكسەرۋ جۇرگىزدى.

ناتيجەسىندە وسىنداي اتى-جوندەگى شەتەلدىك ازاماتتىڭ قازاقستان شەكاراسىن مۇلدە كەسىپ وتپەگەنى بەلگىلى بولدى. وسى جاعدايدان كەيىن جۇرگىزۋشى سەلينوگراد اۋدانىنىڭ پوليتسيا بولىمىنە جەتكىزىلدى.

ايتا كەتەرلىگى بۇل ازامات بيىلعى اقپان ايىندا ەكىباستۇز قالاسىندا ماس كۇيىندە كولىك باسقارعانى ءۇشىن ۇستالعان. ەكىباستۇز قالالىق سوتىنىڭ شەشىمىمەن ول اكىمشىلىك قاماۋعا الىنىپ، 7 جىلعا كولىك جۇرگىزۋ قۇقىعىنان ايىرىلعان بولاتىن.

الايدا زاڭدى اينالىپ ءوتۋ ماقساتىندا، ول قىرعىز رەسپۋبليكاسىنىڭ اتىنا جاسالعان جالعان جۇرگىزۋشى كۋالىگىن پايدالانۋعا تىرىسقان. قازىرگى تاڭدا پوليتسيا قىزمەتكەرلەرى جۇرگىزۋشىگە قاتىستى اكىمشىلىك حاتتاما تولتىرىپ، كولىگىن ايىپ تۇراعىنا جاپتى.

سونىمەن قاتار، جالعان قۇجاتتاردىڭ قاي جەردە جانە قانداي جاعدايدا جاسالعانىن انىقتاۋ جۇمىستارى جالعاسۋدا.